Guvernatori Sejko kundër Edi Ramës për amnistinë fiskale: Legalizimi i parave të krimit dhe korrupsionit, rrezik serioz

Guvernatori i Bankës së Shqipërisë, Gent Sejko ka dale dje kundër kryeministrit Edi Rama, ndërsa deklaroi se amnistia fiskale ka përfitimet e veta, por sipas tij, duhet të bëhet në mënyrë të kujdesshme në mënyrë që të shmangë të ardhurat nga kriminaliteti dhe korrupsioni. Gjatë raportimit në Komisionin Parlamentar të Ekonomisë dhe Financave, Sejko u shpreh se nevojiten masa forcuese nga Ministria e Financave dhe Ekonomisë në mënyrë që pas kësaj amnistie niveli i evazionit fiskal të jetë sa më i ulët. Po ashtu, sipas Sejkos, do të ndikonte edhe në rritjen e të ardhurave në buxhet, pasi amnistitë shoqërohen me një taksë për buxhetin. Sipas Sejkos, bërja e amnistisë duhet të jetë e mirëmenduar dhe funksionale.“Amnistia fiskale ka kosto dhe përfitime. Amnistia fiskale do të rriste injektimin e likuiditeteve në ekonomi, por përfitimi më i madh që ne si Bankë shohim, është formalizimi i ekonomisë, pasi do të do të rritej numri i llogarive bankare dhe i deklarimeve të fondeve financiare të deklaruara”, tha Sejko.

Sejko rendit rreziqet

Ndërkohë, guvernatori Gent Sejko renditi edhe dy rreziqe kryesore që sipas tij, duhen mbajtur parasysh. Ai deklaroi se duhet të bëhet e qartë që kjo amnisti do të bëhet një herë e përgjithmonë dhe duhet të jetë e mirëmenduar dhe funksionale. “Nga krahu tjetër ka dy rreziqe kryesore të cilat duhen mbajtur parasysh, shmangia e kriminalitetit dhe korrupsionit nga ky deklarim. Pra duhet të jetë e qartë që ligji duhet të bëjë të sigurt të shmangë paratë e ardhura nga kriminaliteti dhe korrupsioni qoftë politik apo çdo lloj tjetër korrupsioni dhe duhet shmangur koncepti që do të ketë përsëritje të procesit. Pra duhet të bëhet e qartë që kjo amnisti do të behet një herë e përgjithmonë, duhet të jetë e mirëmenduar dhe funksionale”, deklaroi Sejko. Njëkohësisht, theksoi Sejko, duhet të shoqërohet me forcimin e masave formalizuese nga institucionet ligjzbatuese, Ministria e Financave dhe Ekonomisë dhe institucionet e tjera në vend që mbledhin të ardhura, në mënyrë që pas amnistisë, niveli i evazionit fiskal të jetë sa më i ulët. Ndërkohë, kryeministri Edi Rama deklaroi pak javë më parë se nga amnistia fiskale do të përjashtohen të gjithë ata që kanë pasur pozicione të rëndësishme shtetërore dhe ata që janë të dënuar për vepra që lidhen me drogën, krimin etj.“Ne jemi një vend me emigrantë që janë heronj dhe kanë shumë para që janë nën dyshek. Amnistinë fiskale do ta bëjmë se është edhe dëshira e një shumice të rëndësishme. Komuniteti ndërkombëtar e para nuk është ai që do të ndërtojë Shqipërinë. Marrëdhëniet tona me komunitetin ndërkombëtar janë të një interesi reciprok dhe partneriteti. Ka ikur koha e Shqipërisë vasale. Këtu ne jemi në vendin tonë dhe kemi të drejtën që paratë e djersës, të punës së gjithë këtyre njerëzve. 84 vota për miratimin e amnistisë fiskale do t’i gjejmë në parlament. Me botën tjetër ne nuk negociojmë. Në parlament do të kërkojmë votat dhe do të ndajmë një interes kombëtar. Këtë e kemi marrë edhe si përgjegjësi ndaj gjysmë milioni njerëzish që shprehën mendimin e tyre”, nënvizoi Sejko.