Ja çdo të ndodhë me pensionet për vitin 2024, si i justifikon kryeministri Rama të ardhurat e ulëta që marrin të moshuarit

Zbardhen të dhëna të tjera nga buxheti i planifikuar nga qeveria shqiptare për vitin 2024 në lidhje me pensionet. E ndërsa pagat shkojnë në një trajektore të fortë në rritje, nuk mund të thuhet e njëjta gjë për pensionet.  Shpenzimet që planifikohen për këtë zë kushtojnë 73 mln euro, nga të cilat 39 do të ndahen për mbrojtjen nga rritja e çmimeve dhe 34 mln si bonus i fundvitit. Flobens Dilaveri, ish-Drejtor i Përgjithshëm i Tatimeve deklaroi për Money se pensionet duhet të ishin prioritet dhe rritja të ishte më e madhe se indeksimi. “Patjetër që ka mundësi për të rritur pensionet dhe duhet të ishte prioritet, sepse kur shpenzojmë  210 mln euro pë rritjen e pagave, por kjo duhej të shoqërohej me rritje më të madhe se indeksimi, sepse dihet niveli i pensioneve dhe veç asaj ata nuk kanë mundësi të shtojnë të ardhurat përveç mundësisë që u jep pensioni”. Po ashtu ditën e djeshme ka folur dhe kryeministri Rama për këtë situatë. Ai është justifikuar për pensionin e ulët që marrin të moshuarit. Nga Pogradeci, ku Rama foli në Asamblenë e Zgjeruar të PS, u shpreh se numri i pensionistëve është shumë më i lartë se ai i punonjësve të shtetit. Shkurt, Rama tha se “kaq mundësi kemi” për pensionistët. Sipas tij, të rinjtë nuk duhet të ankohen dhe të thonë se gjyshi apo babai e ka pensionin e ulët, pasi ata nuk ka paguar kontribute. “Unë e di shumë mirë që për pensionistët nuk do mjaftojë dot asnjëherë ajo që ne bëjmë në raport me ata që bëjnë. Por në mënyrë transparente këto janë mundësitë dhe këto janë shifrat. Kemi një numër të lartë pensionistësh krahasimisht me numrin e punonjësve të shtetit dhe për këtë arsye edhe rritja e pensioneve është me e ngadalte. Duke pasur parasysh që nëse ka një gropë që ne nuk e kemi mbyllur ende është gropa e krijuar nga mungesa e kontributeve shoqërore. Se kollaj është sot të thuash se gjyshi apo babai ka një pension të ulët, por duhet të pyesësh veten që unë kam paguar kontribute që gjyshi apo babai të ketë një pension të mirë? Përgjigjja është jo”, tha Rama.