Konfindustria shpërthen në sulme të forta ndaj Bordit të Transparencës, akuza se karburanti në Shqipëri është më i shtrenjti në rajon dhe po hyn kontrabandë, thirrje drejtësisë të hetojë

Konfindustria ka shpërthyer në sulme të forta ndaj Bordit të Transparencës. Kjo e fundit ka  deklaruar se karburanti në Shqipëri është më i shtrenjti në rajon dhe po hyn kontrabandë. Çmimi i naftës në treg duhet të ishte 200 lekë nga 209 që është përcaktuar nga Bordi i Transparencës në mbledhjen e fundit. Konfindustria ka akuzuar Bordin për konflikt interesi ndërsa ka theksuar se me vendimet që po merr, ky organizëm  po sjell pasoja shkatërrimtare për biznesin dhe qytetarët. Konfindustria ka akuzuar Bordin e Transparencës për qëndrim në dëm të interes publik me vendimet për ndryshimin e çmimeve të karburanteve. Ky organizëm shprehet se me çmimet e karburanteve në Shqipëri janë më të larta në rajon dhe nuk reflektojnë çmimet e tregjeve botërore. Konfindustria kërkon themelimin e Entit Rregullator të Karburanteve në varësi të Kuvendit të Shqipërisë dhe me përbërje të profesionistëve, pasi sipas tyre Bordi i Transparencës ka në përbërje anëtarë me konflikt interesi, ku gjysma e antarëve vendimmarrës janë përfaqësues të kompanive që duhet të jene nën kontroll. “Konfindustria ka kërkuar themelimin e Entit Rregullator të Karburanteve në varësi të Kuvendit të Shqipërisë dhe me përbërje të profesionistëve. Bordi i Karburanteve ka në përbërje anëtarë me konflikt të qartë interesi. Gjysma e anëtarëve vendimmarrës janë pikërisht përfaqësues të subjekteve, që duhet të jene objekt kontrolli. Konfindustria shpreh shqetësimin e përsëritur për mënyrën e vendimmarrjeve të Bordit të Karburanteve, qartësisht në kundërshtim me interesin publik me çmimet më të larta në Rajon dhe kahjet e dukshme rënëse të tregjeve botërore. Çmimet e larta krahësimore dhe absolute të karburanteve janë me pasoja afatgjata shkatërrimtare për biznesin, qytetarët, ekonominë kombëtare si dhe nxisin kontrabandën masive, që mund të shkojë në mbi 300 milion euro/vit”, thotë Konfindustria.

Buxhuku: Bordi ka anëtarë që duhet të jenë objekt hetimi

Ndërsa nafta në tregjet botërore po bie në nivelet më të ulëta që nga muaji shkurt i këtij viti, funksioni i Bordit të Transparencës duket gjithnjë e më i pavlerë dhe i dëmshëm për konsumatorët. Në dy javët e fundit, Bordi ka dëshmuar se mblidhet jashtë orarit zyrtarit, në fundjavë dhe që pas sfidës së Ministres së Financave për të marrë pjesë në një mbledhje ende nuk kemi marrë një përgjigje. Ndërkohë në fundjavë, teksa Maqedonia e Veriut e uli edhe më tej me 4 lekë çmimin e naftës, Bordi bëri dy lëvizje të njëpasnjëshme duke e rritur në një total prej 3 lekësh. Sipas ekspertëve Bordi po dëmton qytetarët me çmimet më të larta të naftës në rajon. Administratori i Konfindustrisë Gjergj Buxhuku, shprehet se Bordi ka anëtarë në të që duhet të jenë objekt hetimi.“Bordi duhet të kthehet në një ent rregullatorë të përbërë nga profesionistë që varen nga Kuvendi i Shqipërisë, për një arsye të thjeshtë. Momentalisht Bordi ka anëtarë në të që duhet të jenë objekt hetimi, pra kemi një konflikt të pastër interesi. Në këto kushte ne nuk po funksionojmë në një treg të lirë, por oligopol”, shprehet administratori i Konfindustrisë Gjergj Buxhuku. Sipas tij, mbajtja e çmimeve të larta sipas konfidustrisë po nxit edhe më tej kontrabandën e naftës.“Çmimet e larta të naftës po nxisin një fenomen që është shumë i rrezikshëm dhe që duhet hetuar menjëherë. Si barra e lartë fiskale ashtu edhe çmimi kanë nxitur kontrabandën, e cila llogaritet në disa qindra miliona euro çdo vit në Shqipëri dhe këto janë para që vidhen nga xhepat e shqiptarëve”,  shton Buxhukui. Vendet e G7-ës arritën një marrëveshje mjaft të rëndësishme për kufizimin e çmimit të naftës ruse, e cila ka dërguar sinjale nëpër tregje në mbajtjen e çmimit të stabilizuar dhe në ulje. Ndërkohë Shqipëria prej katër ditësh naftë e blen 3 lekë deri në 8 lekë më shtrenjtë se vendet e rajonit.