Marrëveshja me FAO-n, ministrja Anila Denaj: 7.5 milionë dollarë për zgjidhje inovative në Bujqësi

Ministrja e Bujqësisë dhe Zhvillimit Rural, Anila Denaj nënshkroi dje një marrëveshje kuadër me drejtuesin rajonal të FAO, Raimund Jehle. Ministrja Denaj bëri të ditur se marrëveshja kuadër mes Ministrisë së Bujqësisë dhe Zhvillimit Rural dhe FAO është e bazuar në një program, i cili deri në vitin 2026 do të mbështesë sektorin me 7.5 milionë dollarë, duke integruar në bujqësi zgjidhjet inovative që nxisin zhvillimin ekonomik të qëndrueshëm, të kujdesshëm me mjedisin dhe gjithëpërfshirës nga ana sociale në zonat rurale të vendit. Ministrja Denaj theksoi se një nga kulturat që do të mbështetet është gështenja e Tropojës, me qëllim ndërtimin një marke gjeografike cilësie. “Për kultivuesit e gështenjës në Tropojë do të nisim në terren zbatimin e një projekti me objektiv ndërtimin e një zinxhiri vlere funksional që prek të gjitha hapat si mbrojtja nga dëmtuesit, vjelja, ruajtja, përpunimi dhe tregtimi i gështenjës me qëllim ndërtimin një marke gjeografike cilësie”, u shpreh ministrja. Ajo po ashtu foli për një plan të strukturuar për fuqizimin e tre produkteve të tjera thelbësore në zinxhirin e vlerës. “Kemi një plan të strukturuar për fuqizimin e tre produkteve të tjera thelbësore në zinxhirin e vlerës: bimët medicinale në Delvinë, mjaltin në Dibër dhe shafranin në Shkodër. Jam besimplotë për rrugën që kemi përpara dhe besoj se, së bashku me FAO, do të ndërtojmë një të ardhme më të qëndrueshme për prodhuesit shqiptarë”, deklaroi ministrja Denaj.