Çmimet e karburanteve bien në bursa, Bordi i Transparencës shtrenjton naftën dhe benzinën, shqiptarët “viktima” të “orekseve” të oligarkëve

Bordi i Transparencës ka sfiduara shqiptarët dhe qeverinë, teksa dje ka rritur për herë të dytë brenda janarit naftën dhe benzinën, ndonëse në bursë dhe në vendet e rajonit, çmimet e karburanteve janë shumë të lira, statistika këto që duhet të reflektoheshin edhe në tregun e brendshëm në Shqipëri. Dje janë publikuar çmimet e reja të vendosura nga Bordi i Transparencës për naftën, benzinën dhe gazin. Kështu duke nisur nga dje ora 18:00 nafta do të kushtojë 2 lekë më shumë, pra nga 208 lekë që ishte do të shitet me 210 lekë për litër. Rritje ka pësuar edhe çmimi i benzinës. Nga 189 lekë që ishte më parë, do të shitet me 192 lekë për litër. Ulje ka pësuar vetëm çmimi i gazit, i cili do të shitet me 69 lekë për litër, nga 71 lekë që ishte më parë. Pra, pavarësisht se në botë dhe rajon nafta është e lirë, qytetarët shqiptarë paguajnë më shtrenjtë se ta, për shkak se çmimet e karburanteve në Shqipëri diktohen nga oligarkët. “Referuar të dhënave lidhur me bursën Platts të datës 24.01.2023, kemi ndryshime të çmimit nga ai përcaktuar në mbledhjen e fundit, konkretisht rezulton se çmimi (FOB/MED $ Ton) i Benzinës është 892, +50 nga data 16.01.2023, $/ Ton, ndërsa çmimi i Gazoilit/Diesel është 978, +41 nga data 16.01.2023, $/Ton. Kursi i këmbimit i BSH ka pësuar ulje të lehtë në 107. 56 (-0.43 nga data 16.01.2023). Si rrjedhojë çmimet e vendosura janë : Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 210 lekë/litri, ndërsa i shitjes me shumicë jo më shumë se 198 lekë/litër. Çmimi i shitjes me pakicë i nënproduktit benzinë e standardit SSH EN të jetë jo më shumë se 192 lekë/litri, ndërsa i shitjes me shumicë jo më shumë se 180 lekë/litër. Çmimi i shitjes me pakicë i nënproduktit gaz, të jetë 69 lekë/litri me pakicë dhe i shitjes me shumicë 57 lekë/litër për automjetet. Çmimi i gazoilit për peshkim është vendosur 116 lekë/litër”, njofton Bordi. Çmimet e caktuara nga Bordi do të hynë në fuqi në datë 25 Janar, ora 18.00, dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes. Bordi i transparencës thotë se për vendosjen e çmimeve që në krijimin e tij i është përmbajtur me përpikmëri në vendimet e tij lëvizjes së bursës Platts të Mesdheut për gazoilin, benzinën, si dhe faturave zyrtare të operatorëve. Ministria e Financave dhe Ekonomisë bën me dije se jo çdo lëvizje e bursës së naftës bruto reflektohet në të njëjtën kohë dhe në të njëjtën masë në bursën e gazoilit dhe benzinës. Ndërkohë, nafta dhe benzina në Shqipëri janë ndër më të shtrenjtat në Europë dhe më të shtrenjtat në rajon, gjë e cila bënë që qytetarët shqiptar të paguajnë për karburantet më shtrenjtë se vendet e rajonit

Ja si u paralajmërua shkrirja e Bordit të Transparencës

Pak ditë më parë, u tha se Bordi i transparencës për përcaktimin e çmimeve të karburanteve pritet të shkrihet shumë shpejt. U deklarua se Bordi i Transparencës në mbledhjen e ardhshme mund të vendosë shkrirjen e vet, pasi kjo lejohet dhe nga vendimi i Këshillit të Ministrave, i marrë në momentin e krijimit të këtij bordi. “Parashikimet e këtij kreu zbatohen për aq kohë sa zgjat periudha e situatës së veçantë. 2. Zbatimi i parashikimeve të këtij kreu fillon me shpalljen e situatës së veçantë me vendim të Këshillit të Ministrave. Përfundimi i situatës së veçantë dhe i zbatimit të parashikimeve të këtij kreu përcaktohet me vendim të Bordit”, thuhet në VKM. Ndërkohë, ministrja Belinda Balluku deklaroi se një vendim i tillë do të ishte i mirëpritur, por nuk është në kompetencat e saj pasi i përket Ministrisë së Financave.“Duke qenë që çmimi është stabilizuar, kemi një diskutim për ndalimin e të funksionuarit. I përket Ministrisë së Financave dhe do jetë i mirëpritur si vendim. Shteti do të monitoroj edhe nëse bordi nuk do të jetë ekzistues”, deklaroi ministrja Balluku.