Miratohet rritja e pensioneve, 767 mijë persona përfitojnë indeksim me 8.6 për qind nga 1 tetori, Ministria e Financave dhe Instituti i Sigurimeve Shoqërore zbardhin detajet

Nga 1 tetori mbi 767 mijë pensionistë do të përfitojnë rritjen në masën 8.6%. Dje, ministri i Financave dhe Ekonomisë, Ervin Mete drejtoi mbledhjen e Këshillit Administrativ të Institutit të Sigurimeve Shoqërore, ku u miratua vendimi për indeksimin e të gjitha kategorive të pensioneve që mbulon Instituti i Sigurimeve Shoqërore, sipas legjislacionit në fuqi. Indeksi i Çmimeve të Konsumit të shportës së mallrave dhe shërbimeve për pensionistët, që llogaritet nga INSTAT, rezultoi në masën 8.6 %. Vendimi do të kalojë për miratim në Këshillin e Ministrave dhe parashikohet që nga data 1 tetor 2023, mbi 767 mijë përfitues të të gjitha kategorive të pensioneve do të paguhen të indeksuar me këtë përqindje. Edhe pensioni social, që përfitohet nga personat rezidentë shqiptarë mbi moshën 70 vjeç, të cilët nuk kanë të ardhura, do të pësojë rritje në të njëjtën përqindje. Nga kjo masë do të përfitojnë 2 499 persona, në shkallë vendi. Pensioni mesatar (që llogaritet si produkt i gjithë shpenzimeve për pensione me numrin e pensionistëve) do të rritet në 18,794 lekë në muaj nga 17,306 lekë që është aktualisht, duke përmirësuar edhe shkallën e zëvendësimit të pensionit si një tregues i rëndësishëm i skemës. Efektet financiare të politikës së indeksimit të pensioneve për tre muajt e mbetur të vitit 2023 llogariten në rreth 3.2 miliardë lekë, ndërsa ai mbartës për vitin 2024 do të jetë 12.1 miliardë lekë. Këshilli Administrativ, në nisje të mbledhjes së mbajtur, zgjodhi si kryetar ministrin e Financave dhe Ekonomisë, Ervin Mete.

Indeksimi i pensioneve

Ndërkohë kujtojmë se nga muaji i ardhshëm pensionistët në qytet do të marrin mesatarisht 1 mijë e 500 lekë më shumë, ndërsa ata në fshat më pak se 900 lekë. Nga 17 mijë e 350 lekë aktualisht, ajo që merr çdo muaj një i moshuar që jeton në qytet do të bëhet 18 mijë e 842 lekë.Gati 1 mijë e 400 lekë më tepër do të marrin edhe përfituesit e pensionit të invaliditetit në zonat urbane, ndërsa ata që trajtohen me pension familjar do të përfitojnë rreth 700 lekë më tepër. Ndërkohë pagesa mujore që merr një i moshuar në fshat, pas indeksimit me 8.6 për qind të do të bëhet 11 mijë e 239 lekë nga 10 mijë e 239 lekë që aktualisht është. Nga 1 tetori do të marrin 712 lekë më shumë përfituesit e pensionit të invaliditetet që jetojnë në fshat, ndërsa ata që trajtohen me pension familjar do të përfitojnë rreth 190 lekë më tepër. Nga rritja me 8.6 për qind do të përfitojnë rreth 687 mijë qytetarë, 585 mijë e 809 në zonat urbane dhe 101 mijë e 114 në ato rurale. Për herë të fundit pensionet në vend u indeksuan në masën 6 për qind tetorin e vitit të shkuar.

Braçe: Pensionet do të indeksohen me 8.6% që nga 1 tetori

Nga ana tjetër, pak ditë më parë deputeti i Partisë Socialiste Erion Braçe duke marrë fjalën në Kuvend tha se, që nga 1 tetori, e gjithë masa e pensionistëve në Shqipëri do të marrë rritje të pensionit me 8.6 %. Ai theksoi se, kjo rritje mbulon plotësisht normën e rritjen së inflacionit dhe se do të sjellë për 3 muajt në vijim 3.2 milionë lekë plus për pensionistët.“Nga 1 tetori, e gjithë masa e pensionistëve në Shqipëri do të marrë rritje të pensionit me 8.6 %.Rritja me 8.6 % mbulon plotësisht normën e rritjes së inflacionit për pensionistët. Për pak ditë kjo do të jetë efektive dhe do të sjellë për 3 muajt në vijim në buxhetet e pensionistëve 3.2 milionë lekë plus, ose 32 milionë USD. Kjo rritje për vitin e ardhshëm do të transferojë tek pensionistët 121 milionë USD, duke i shtuar këtu edhe faturën e bonusit të pensionistit, që qeveria ka adresuar për ta, në muajin dhjetor. Kjo është fatura e plotë”, deklaroi Braçe.