Nuk ka fund batërdia ndaj qytetarëve, rritet sërish çmimi i karburanteve në vend, ja me sa shitet nafta, benzina dhe gazi

Nuk ka fund batërdia ndaj qytetarëve, teksa çmimi i karburanteve në vend ka pësuar dje një tjetër rritje. Në pikat e furnizimit me pakicë ditën e djeshme 1 litër naftë u shit deri në 214 lekë, ndërsa benzina 216 lekë për litër.  Ndërkohë që çmimi i gazit është 58 lekë për litër. Shihet se çmimi i karburanteve ndryshon në varësi të pikave. Kjo është e disata herë që rritet çmimi i karburanteve që pas shkrirjes së Bordit të Transparencës. Operatorët e tregut thonë se shkak për rritjen e çmimeve është bërë shtrenjtimi i karburanteve në bursa. Bordi u shfuqizua në datën 7 qershor, ndërsa vendimi i tij i fundit i përket datës 26 maj, ku çmimi tavan i tregtimit me pakicë të naftës ishte 176 lekë, dhe i benzinës 179 lekë.

Çmimi i naftës, Tabaku: Faji i taksimit socialist

Ndërkohë pak ditë më parë Deputetja e Partisë Demokratike, Jorida Tabaku ka ngritur sot shqetësimin se ndonëse në tregun ndërkombëtar çmimin i karburantit ka rënë, në Shqipëri nuk ndodh diçka e tillë. Deputetja bën përgjegjëse qeverinë, teksa e quan ortake me oligarkët. Tabaku thekson po ashtu se një arsye e çmimit të lartë dhe të pandryshuar është edhe taksimi socialist. Sipas saj, si pasojë e këtyre dy arsyeve, 50 përqind e vlerës shkon aktualisht në buxhet, ndërsa gjysma tjetër në marrëveshjet me oligarkët. “Kanë një pyetje qytetarët shqiptarë sot. Përse nuk ndryshon çmimi i karburantit në Shqipëri çfarë do të ndodhë në tregun ndërkombëtar? Qoftë 2$/barrelë apo 200$/barrelë shqiptarët përherë paguajnë mbi 200 lekë/litër dhe kjo nuk ndryshon. Qoftë në kohë krize apo kohë paqe. Përgjigja është shumë e thjeshtë; ortakëria mes qeverisë dhe oligarkisë. Si me bordin e oligarkëve edhe pa bordin e tyre çmimi nuk po ndryshon dhe kjo tregon si sistemi është i kapur, si ka një mungesë konkurrence dhe çmimi vendoset në tavolinë si me ekzistencën e bordit si pa të. Arsyeja e dytë janë taksat. Taksimi socialist! Taksimi që paguajmë në çdo pikë karburanti! Në çdo pompë nafte kur blejmë karburant dhe paguajmë 50% të çmimit taksa. Këto dy arsye kanë kapur prej fyti sistemin dhe çojnë 50% të vlerës në buxhet ku bëjnë biznes me të dhe 50% tjetër të vlerës në marrëveshje me oligarkinë. Kush vuan në fund të ditës? Sigurisht qytetari”, shkroi Tabaku.