Për Ministrinë e Arsimit, nafta ende nuk është shtrenjtuar, KLSH: VKM për transportin e mësuesve nuk ka reflektuar çmimet e reja

Rritja e çmimit të karburanteve dhe mosreflektimi i çmimeve të reja në vendimet e qeverisë, po krijon problematika me transportin e mësuesve në rrethe. Për shkak të kësaj situate mësuesit janë detyruar të paguajnë një çmim më të lartë sesa parashikohet në VKM e cila përcakton dhe fondet që duhet u jepen kësaj kategorie. Kjo evidentohet nga Kontrolli i Lartë i Shtetit, që merr si shembull qytetin e Librazhdit. Praktika është që mësuesve që banojnë larg shkollave, t’u jepet një sasi parash si rimbursim për transportin. Por edhe pse çmimet e karburanteve dhe si rrjedhojë të biletave janë shtrenjtuar prej thuajse 1 viti, sërish atyre u jepet e njëjta kuotë parash. Mësuesit e Librazhdit i janë drejtuar më një ankesë KLSH, me argumentin se bileta ishte dyfishuar me rritjen e çmimit të naftës dhe ndërkohë, institucionet përkatëse nuk e kanë reflektuar situatën e re të çmimeve të karburanteve. Pas kësaj ankese, Kontrolli i Lartë i Shtetit ka nisur një proces auditues, në fund të të cilit ka rezultuar se ankesa e mësuesve ishte e drejtë.  Në këtë kontekst, KLSH ka kërkuar nga ministria e Arsimit, që në VKM-në për rimbursimin e transportit të mësuesve, të reflektohet situata e re me çmimet e karburanteve. Mesatarisht gjatë një viti shkollor transportohen 35 mijë -38 mijë nxënës si dhe 11 mijë e 800 -12 mijë e 500 mësues. Numri i nxënësve dhe mësuesve ndryshon në bazë të numrit të shkollave që rikostruktohen apo rindërtohen. Fondi i dedikuar për mbulimin e shpenzimeve të transportit ndër vite ka ndryshuar. Në vitin 2021, fondi për transportin në shkolla ishte rreth 800 milionë lekë. Ndërkohë, në vitin 2022, kjo shifër u rrit në 1.2 miliardë lekë. Por ajo që ka ndodhur këtë vit, është një ulje e e buxhetit, në 1 miliardë e 55 milionë lekë. Këtë vit, për këtë qëllim janë caktuar 145 milionë lekë më pak se vitin e kaluar, edhe pse çmimet e karburanteve vijojnë të mbeten të larta. Pranë Ministrisë së Arsimit  nëse transporti është realizuar sipas kushteve të duhura, në përgjigjen e marrë në lidhje me këtë çështje thuhet se transportimi i mësuesve është realizuar plotësisht për vitin 2022, konform akteve ligjore dhe nënligjoreve që rregullojnë shërbimin e transportit ndërqytetar apo rrethqytetas.