Qeveria gati projektligjin, qytetarët do të tatohen me 15% qytetarët për qiratë, dhuratat, trashëgimitë dhe të ardhurat nga lojërat e fatit

Qytetarët shqiptarë do të tatohen me 15 për qind për të ardhurat që marrin nga dhënia me qira e pasurive të paluajtshme si ambiente banimi apo komerciale. Projektligji i ri për “tatimin mi të ardhurat” përcakton të gjitha të ardhurat e individëve për të cilat do të duhet të paguhet tatim. Kështu, neni 60 i draftit të hedhur për konsultim, citon se: individët rezidentë dhe jo rezidentë në Republikën e Shqipërisë, të cilët marrin një dhuratë ose trashëgimi të aseteve të ndodhura në Shqipëri ose jashtë saj apo marrin fitime nga lojërat e fatit të zhvilluara në Shqipëri ose jashtë saj, do të paguajnë një normë tatimore prej 15 për qind mbi vlerën. Dhurata në këtë rast nënkupton pasurinë e luajtshme ose të paluajtshme ose paratë e fituara pa ndonjë kompensim në këmbim. Ndërsa, termi “trashëgimi”, nënkupton pasurinë e luajtshme ose të paluajtshme ose paratë e fituara si rezultat i kalimit për shkak të vdekjes nga personi i vdekur tek trashëgimtarët e tyre. Sendet nga dhuratat dhe trashëgimia vlerësohen me vlerë nominale ose vlerën e tregut, cila prej tyre është vlera më e madhe. Ndërkohë që në këtë pikë projektligji përcakton disa përjashtime ligjore. Konkretisht, përjashtohen nga tatimi: dhurimet dhe trashëgimia e përfituar nga ata që do të kualifikoheshin si trashëgimtarë ligjorë në radhë të parë dhe të dytë; dhurimet dhe trashëgimitë të marra nga ata që do të kualifikoheshin si trashëgimtarë të ligjshëm përveç shkallës së parë dhe të dytë, deri në 5 milionë lekë për tatimpagues për pasuritë e paluajtshme, dhe deri në 1 milionë lekë për pasuritë e luajtshme për tatimpagues. Si dhe kalimi i të drejtës së pronësisë trashëgimtarëve ligjorë nëpërmjet dhurimit dhe/ose heqjes dorë nga pasuria, kur prona rrjedh nga bashkëpronësia e detyrueshme. Edhe në këtë rast, përjashtimi nga tatimi bëhet nëse trashëgimtari ose përfituesi i dhuratës provon që sendet e dhuruara ose të trashëguara janë tatuar paraprakisht ose janë raportuar nga i vdekuri ose dhuruesi. Ndërkohë kjo normë tatimore do të paguhet edhe për honoraret dhe interesat bankare.

Vlera e banesave në Tiranë është rritur mbi 60%

Ndërkohë, rreth 80% të pasurisë së familjeve shqiptare e zënë pikërisht pronat. Pra, pjesa dërrmuese e pasurisë së një familje mesatare shqiptare përfaqësohet pikërisht nga prona. Këto shifra marrin edhe një tjetër sens nëse shtojmë faktin se 65% e pasurisë së familjeve shqiptare përfaqësohet nga banesa kryesore, apo se mbi 90% e familjeve e zotërojnë banesën ku ata jetojnë. Rritja e çmimeve të banesave gjatë viteve të fundit ka qenë e ndjeshme, duke bërë që edhe vlera e pronës për pjesën dërrmuese të familjeve shqiptare, sidomos në kryeqytet, të rritet në nivele të konsiderueshme. Indeksi Fischer i Bankës së Shqipërisë, i vetmi indikator zyrtar që mat ecurinë e çmimit të banesave tregon se, në fund të vitit 2020, në Tiranë, rritja fiksohet pranë 46.7% krahasuar me periudhën bazë, vitin 2013. Në vitin 2021, krahasuar me vitin 2020, çmimet e banesave rezultojnë 8.5% më të larta në kryeqytet. Pra, nga viti 2013, deri në vitin 2021, në harkun e 8 viteve, vlera e banesës si pronë në Tiranë është rritur me rreth 60%, sinjalizojnë shifrat zyrtare.