Shpërndahen 8 miliardë lekë shpërblime, sa do paguhen pensionistët e arsimtarët deri më 10 janar, ja kategoritë që përfitojnë dhe sa është vlera

Qeveria shqiptare ka nisur shpërndarjen e pakos 800 milionë lekë (saktësisht 800.068 milionë lekë) për muajin janar për 1 milion shqiptarë në kuadër të përballimit të rritjes së inflacionit shkaktuar nga rritja e çmimeve si pasojë e Luftës Rusi-Ukrainë. Ashtu siç është paralajmëruar më parë nga kryeministri Edi Rama, pensionistët, invalidët, kryefamiljaret me 3 fëmijë dhe ndihmë ekonomike, punonjësit e administratës policët, zjarrfikësit, mësuesit, ushtarët janë kategoritë do të marrin të ndarë respektivisht ndihmë dhe shpërblime ekonomike. Pakoja e Madhe, e cila përbën fondin reserve të buxhetit të këtij viti, do të shpërndahet në vlera nga 8 mijë deri në 20 mijë lekë. Për punonjësit e qeverisjes së përgjithshme dhe pedagodët, mbështetja financiare duhet të shpërndahen brenda datës 10 janar, ndërsa shpërblimet duhet të tërhiqen brenda 3 viteve dhe në rast të kundërt, do të ruhen si pjesë e buxhetit të shtetit.

Ja kategoritë që përfitojnë 8 mijë lekë shpërblim

Sipas vendimit të botuar në Fletoren Zyrtare, 695 mijë pensionistë, 71 mijë persona me aftësi të kufizuar dhe 57.300 familje me ndihmnë ekonomike do të marrin ndihmë ekstra 8 mijë lekë për janarin. Nga ana tjetër, ndihmë 20 mijë lekë do të jepen dhe për 6700 nëna të papuna me 3 ose më shumë fëmijë që marrin dhe ndihmë ekonomike.

10-20 mijë lekë për mësuesit, infermierët dhe policët e thjeshtë

Administrata, infermierët, mjekët, policët dhe mësuesit do t’u shpërndahet shpërblimi në varësi të pages, ku nën 60 mijë lekë do të përfitojnë 20 mijë lekë bonus dhe ata me pagë bruto mbi 60 mijë lekë përfitojnë 10 mijë lekë. Saktësisht, 20 mijë lekë do shpërblehen 12280 të administratës, 4588 policë të burgjeve me 10 mijë lekë, 5411 mjekë me 10 mijë lekë, 11 mijë infermierë me 10 mijë lekë, 3267 infermierë me 20 mijë lekë, 30.693 mësues e edukatorë me 10 mijë lekë, 20 mijë lekë për 6045 mësues e edukatorë dhe 9604 policë të thjeshtë me 10 mijë lekë.

20 mijë lekë shpërblim për RENEA-n, FNSH, FLO, këmbësorët dhe ushtarët bazë

Qeveria ka vendosur të shpërblejë me 20 mijë lekë punonjës të forcave policore dhe ushtrisë. Konkretisht, njësitë RENEA (218 anëtarë), Delta (72), Forcat e Ndërhyrjes së Shpejtë (433) dhe Njësia Operacionale (253) , së bashku me 1200 pjesëtarë të këmbësorisë së forcave të armatosura do të shpërblehen për punën e bërë në ruajtjen e rendit dhe sigurisë. Nga ana tjetër, 2200 ushtarë bazë do të marrin 20 mijë lekë. Rama komplimentoi ushtarët e FA, të cilat u çertifikuan si njësi elitare nga NATO gjatë stërvitjeve të përbashkëta ushtarake të vitit të kaluar.

Shpërblim 20 mijë lekë dhe për 1181 zjarrfikës

Këshilli i Ministrave nuk ka lënë pa shpërblyer dhe pjesëtarët e Policisë së Mbrojtjes nga Zjarri dhe për Shpëtim (PMNZSH). 1181 zjarrfikës do të shpërblehen secili me 20 mijë lekë në kuadër të përkushtimit të treguar për shuarjen e zjarreve gjatë stinës së verës.

Kush do t’i shpërndajë ndihmat dhe shpërblimet?

Administrimi i fondeve buxhetore të shpërblimit të pensionistëve, caktimi i shpërblimit për çdo përfitues dhe pagesa realizohen nga Instituti i Sigurimeve Shoqërore, Posta Shqiptare sh.a., dhe bankat e nivelit të dytë, sipas të njëjtave procedura që zbatohen për administrimin e fondit të sigurimeve shoqërore.