Shqipëria del me sukses, emetohet Eurobondi me vlerë 650 milionë euro, ja kush janë bankat përfituese

Shqipëria doli dje në tregun ndërkombëtar për të marrë Eurobondin e 5-të ku ka marrë 650 milionë euro me normë interesi 3.75 për qind. Procesi u drejtua nga zv. kryeministri Arben Ahmetaj dhe ministrja e financave Delina Ibrahimaj. Shqipëria ka mundur të sigurojë të njëjtin shumë Eurobondi si në atë të 2020, por me një normë më të lartë interesi se vitin e kaluar. Në qershor 2020 , Shqipëria mori 650 milionë euro me normë interesi 3.50 për qind. Bankat fituese JP Morgan; Societe Generale; Banca IMI & OTP, janë përzgjedhur si menaxherë bashkëdrejtues dhe do të drejtojnë procesin e emetimit nga Republika e Shqipërisë të Eurobondit në tregun ndërkombëtar duke analizuar edhe interesin e investitorëve të huaj dhe normat e interesit. Në njoftimin e bërë nga kryeministria thuhet, se qeveria do ta përdorë këtë Eurobond kryesisht për financimin e deficitit buxhetor për mbulimin e pagesave të borxhit të huaj. “Republika e Shqipërisë doli në tregjet ndërkombëtare financiare me një obligacion ndërkombëtar të ri 10-vjeçar në vlerën prej 650 milion € me një kupon prej 3.50 për qind me interes 3.75 për qind. Investitorët treguan konfidence duke shprehur interes ne oferta qe kaluan 1.8 here vlerën e kërkuar. Ky ishte një test real për ekonominë shqiptare, qe rikonfirmon besimin e tregjeve ne qëndrueshmërinë e ekonomisë shqiptare edhe në kohe të vështira, pas goditjes se tërmetit dhe pandemisë”, thuhet në njoftimin e kryeministrisë. Ky do të jetë Eurobondi i 5 që vendi ynë do të marrë në tregjet e huaja, pasi deri më tani kemi marrë në tregjet e huaja 1.9 miliardë euro Eurobonde. Në 2010 u emetua Eurobondi 300 milionë euro me normë interesi 7.5 për qind, në 2015 u mor borxh 450 milionë euro me normë 4.75 për qind, në 2018 ishte i radhës 500 milionë euro me interes 3.5 për qind dhe i fundit Eurobond u emetua në qershor 2020 në vlerën e 650 milionë eurove me afat maturimi 7 vjet dhe me normë interesi 3.50 për qind.