Tjetër kredi për energjinë, qeveria miraton marrëveshjen me Agjencinë Franceze për Zhvillim

Qeveria ka miratuar një marrëveshje të re kredie, që do të shkojnë për sektorin energjetik në vend. Projektligji ka kaluar në qeveri, ndërkohë që do të duhet të diskutohet edhe në komisionet parlamentare për të marrë miratimin përfundimtar. Kjo është marrëveshja e radhës e huasë, që qeveria nënshkruar për sektorin energjetik, në harkun kohor të pak viteve. E fundit që mori dakordësinë edhe në parlament kishte një vlerë prej 35 mln euro e që të shkojë për përmirësimin e rrjetit të shpërndarjes të energjisë elektrike në Shqipërinë Veriore pas tërmetit të vitit 2019. Ndërkohë që, pak muaj më parë qeveria mori edhe 2 kredi nga 50 mln euro. Huatë u morën nga KfW gjermane dhe Agjencia Franceze për Zhvillim e do të përdoren për financimin e projektit “Politika për mbështetjen e reformës në sektorin energjetik në Shqipëri” faza II, teksa vitin e kaluar, nga Agjencia Franceze për Zhvillim u morën hua edhe 50 mln euro për të njëjtin qëllim. Në fakt, edhe kredia që u miratua në qeveri një ditë më parë do të shkojë për të njëjtin qëllim dhe do të merret sërish nga Agjencia Franceze për Zhvillim. Nga fundi i vitit 2021, pa përfshirë kredinë e fundit të sapo miratuar, vlera e të cilës nuk është ende publike, huaja për sektorin elektroenergjitikë arrin në 376.5 mln euro, teksa pjesa më e madhe e projekteve realizohet nga Operatori i Shpërndarjes së Energjisë Elektrike.

Pse bizneset nuk po marrin mjaftueshëm kredi?

Bizneset shqiptare kanë ulur ritmin e marrjes së kredive gjatë muajve të fundit dhe ky fenomen është vënë re më së shumti edhe tek eksportuesit, të cilët për shkak të humbjeve miliona euroshe që u ka sjellë kursi i këmbimit, gjenden në staliacion. Dje në një intervistë televizive, kreu i Shoqatës “Pro-Export Albania”, Edvin Prençe, sqaron se kreditimi i pamjaftueshëm pasohet me ngrirje të investimeve. Nga ana tjetër, një problematikë që rëndon mbi sektorin është rritja e kostove të prodhimit, që sërish po reflektohet në mungesë investimesh dhe si rrjedhim humbje konkurueshmërie. Sipas Prençes, e gjithë situata me të cilët po përballen eksportuesit, po sjell shkurtim të linjave të prodhimit dhe si rrjedhim edhe të fuqisë punëtore, të cilët do ta kenë të vështirë të riintegrohen në treg. Pak ditë më parë, eksportuesit kanë publikuar një studim sipas të cilit humbjet për shkak të forcimit të lekut arrijnë deri në 35 milion euro, si dhe kanë kërkuar nga qeveria dhe Banka e Shqipërisë, marrjen e një sërë masave që do tu vinin në ndihmë sektorit për të kapërcyer këtë situatë.