“Portokalli ishte si Big Brother”/ Pas mbylljes së ‘Klanifornias’, Visjan Ukcenaj flet për spektaklin e humorit: Jemi rritur me ëndrrën...

Mbrëmja e parë e tetorit mblodhi para ekranit të gjithë shqiptarët me “Portokalli”, spektaklin prime time.

“Portokalli” vazhdon të shkëlqejë edhe në vitin e 20 të krijimtarisë. Këtë sezon të ri ka ardhur me shumë surpriza për publikun. Aktori i njohur i humorit, Visjan Ukcenaj, i është bashkuar kastit të madh të “Portokallisë”.

I ftuar në rubrikën “Mos i bjer me top” në “E Diell”, aktori u shpreh se është i lumtur që është pjesë e Top Channel dhe pjesë e “Portokallisë”. Visjani tha se emisioni i “Portokallisë” dikur ka qenë si “Big Brother” një sezon, që shikohej në Bllok dhe kudo.

Sipas Ukcenajt, Portokallia e ka bërë humorin të njohur si dhe u ka dhënë aktorëve një dimension tjetër.

Ronaldo: Si je? Si ka shkuar gjithë kjo periudha?

Visjani: Ka qenë në tranzicion pak i vështirë për mua, për faktin se iki nga një realitet tjetër dhe nga një ekip me të cilin pothuajse kishim 12 vite së bashku. Pak a shumë është si të ndahesh nga një lidhje. Por siç jeta n’a ka treguar, jeta vazhdon dhe ndoshta diçka që vjen më pas është akoma më e bukur, më surprizuese që ajo që kemi lënë pas.

Erjola: Je ndarë zemërthyer apo me dëshirë?

Visjani: Jo. Ndarja nuk është asnjëherë e mirë, por unë kisha fatin dhe kënaqësinë, e dëshirën e përbashkët me pronarët e Top Channel, që të isha pjesë e Top Channel. Të jesh pjesë e Top Channel është gjë e bukur, kënaqësi dhe fat. Ndoshta jo të gjithë e kanë mundësinë të jenë pjesë e Top Medias dhe unë jam shumë i lumtur që jo vetëm jam pjesë, por jam pritur si një personazh ‘i madh’ dhe unë e vlerësoj këtë pritje që më kanë bërë. Jam i lumtur që jam pjesë e Portokallisë, një ndër emisionet më të mira të humorit, madje një ndër emisionet që e ka bërë humorin të njohur dhe u ka dhënë një dimension tjetër aktorëve. Dikur Portokallia ishte siç është Big Brother një sezon, Portokallia ka qenë pothuajse 7 vite rresht, në Bllok, në çdo vend shikohej Portokallia. Jemi rritur me ëndrrën për të qenë pjesë e një emisioni të tillë.