“Marie Kraja”, Zana Çela: Festivali është trampolinë për në skenat botërore

Në Teatrin e Operës dhe Baletit starton sot edicioni i 15 i Festivalit Ndërkombëtar i zërave operistikë “Marie Kraja”. Drejtoresha e festivalit, Zana Çela, u shpreh se publiku do të marrë emocione, ndërkohë që në këtë edicion Shqipëria përfaqësohet me dy konkurrentë. Festivali Ndërkombëtar Operistik “Marie Kraja” 30 dhe 31 tetor, në edicionin e 15 të tij ka sjellë në Tiranë 14 këngëtarë nga shtete të ndryshme të botës.

 

“Festivali zhvillohet në dy gara, e arieve dhe këngës. Që vitin e kaluar e futëm garën e këngës në kompeticion madje i kemi caktuar dhe një çmim, që e përcakton orkestra e Teatrit të Operas. Repertori i këngëve është shumë i bukur këtë vit. Shqipëria do të përfaqësohet nga dy këngëtarë, për të cilët ky festival është trampolinë për në skenat e mëdha botërore”, pohoi drejtoresha e festivalit Zana Çela.

 

Për drejtuesen e këtij festivali, e cila prej 15 vitesh ka pasur në vëmendjen zhvillimin e këtij aktiviteti tashmë i njohur dhe për artistë të tjerë në botë, “Marie Kraja” është stacion i rëndësishëm në karrierën ndërkombëtare të këngëtarëve pjesëmarrës. “Duke shpresuar të jetë një urë lidhëse me skenat europiane, sikurse kjo juri përbëhet nga njerëz shumë të rëndësishëm të teatrove europiane, pse jo mbase bëj një figurë dinjitoze dhe tërheq vëmendjen e ndonjërit prej tyre”, shtoi më tej mbi festivalin drejtuesja Çela. Në lidhje me vështirësitë për zhvillimin e këtij festivali ndër vite, sipas saj e rëndësishme është që mbërriti në edicionin e 15.

 

“Fondet për këtë vit u realizuan, por gjithmonë janë problem kryesor. Do të doja që të kishte diçka më shumë, por ne erdhëm në edicionin e 15. Shpresoj që të ketë më shumë sensibilizim mbi festivalin”, shtoi në fjalën e saj Çela. Konkurrentët janë Anna Stylianaki- Greqi, Anna Werle- Gjermani, Daniele Centra-Itali, Elizabeth Bailey- Angli, Emrah Sozer -Turqi, Enkeleda Kamani- Shqipëri, Federica Vitali- Itali, Hector Carcia- Spanje, Heloise Koempgen Bramy- Francë, Kyungho Kim- Korea e Jugut, Maria Helienek- Austri, Timofey Kryukov-Rusi, Yauci Yanes Ortega-Spanje, Armando Likaj-Shqipëri. Juria ndërkombëtare si në çdo edicion edhe këtë vit përbëhet nga emra të njohur të muzikës operistike botërore: Stephen Langridge, Drejtor Artistik i Operas së Goteborgut Suedi, kryetar jurie; Henning Ruhe, Drejtor i Opera Studio në Operën Shtetërore të Mynihut, Gjermani; Sebastian Schwarz, Drejtor Artistik i Teatrit të Vjenës Austri; Nicholas Payne, Drejtor i Opera Europa, Bruksel; Ilir Kerni Drejtor i TOB, Suzana Frashëri, shefe e Katedrës së kantos Universiteti i Artëve Shqipëri dhe Katriot Tusha profesor kanto, Universiteti i Arteve Shqipëri, etj.