“Muzeu Gjethi”, nis bashkëpunimin me Berlin-Hohenschonhausen Memorial

Ministria e Kulturës dhe Berlin-Hohenschonhausen Memorial do të nisin bashkëpunimin për ekspertizë dhe vlerësime në fushën e muzealizimit të muzeut “Gjethi” dhe në përgatitjen e projekteve të tjerë për muzetë e kujtesës në Spaç dhe Shkodër, të njohur si vende të dëshmisë dhe kujtesës. Me këtë bashkëpunim muzeu, ndërtesa e të cilit po i nënshtrohet restaurimit të plotë, hyn në fazën e dytë, atë të muzealizimit. Në një njoftim zyrtar Ministria e Kulturës pohon se do të vazhdojë të japë kontributin e saj në ngritjen e institucioneve të kujtesës që eksplorojnë historinë e komunizmit shqiptar nga viti 1945 deri në vitin 1989, me synim ngritjen e vetëdijes publike përmes materialeve të dokumentuara dhe ekspozitave të ndryshme.

 

Ndërkaq që këto ditë ndodhet në Tiranë për një vizitë pune z. Hubertus Knabe, drejtor i Berlin-Hohenschonhausen Memorial, muzeu i ngritur në kujtesë të ish- burgut famëkeq të torturave, Stasi në Berlin. Knabe, historian dhe aktivist për të drejtat e njeriut, i njohur për botimin e disa veprave mbi diktaturën në shtetet ish-komuniste të Evropës Lindore, veçanërisht në Gjermaninë Lindore, u prit nga Ministrja e Kulturës, Mirela Kumbaro dhe grupi i punës në MK pjesë e të cilit janë kuratorët e projektit, shkrimtari Bashkim Shehu dhe arkitektja muzeologe Elisabetta Terragni, ku u njoh nga afër me punën e deritanishme në “Muzeun Gjethi”. Në takim merrte pjesë atasheu kulturor i Ambasadës Gjermane, znj. Christiane Wolters.

 

Në ditët e qëndrimit në Shqipëri ai do të vizitojë edhe ish-burgun e diktaturës në Spaç dhe “Vendin e Dëshmisë dhe Kujtesës” në Shkodër me synim zhvillimin e një projekti më të gjerë në Muzetë e Kujtesës.  I ndodhur në Tiranë, Knabe solli në vëmendje eksperiencën e ish-burgut te Stasi, i cili vizitohet çdo vit nga më shumë se 436,000 vizitorë, ku numri i nxënësve të shkollave mendohet të shkojë deri në 200.000.