Akademia e Studimeve Arkeologjike do të nisë një betejë ligjore kundër vendimit për mbylljen

Akademia e Studimeve Arkeologjike që doli më parë kundër vendimit të Këshillit të Ministrave për veprimtarinë e saj është në proces të nisjes së një beteje ligjore. Kjo bëhet me dije nga ASA, që dje shpërndau gjithashtu dhe një deklaratë të këshillit shkencor të Institut të Arkeologjisë. “Ju informojmë se Akademia e Studimeve Arkeologjike është në proces të nisjes së një beteje ligjore kundër vendimit të Këshillit të Ministrave për mbylljen e veprimtarisë së ASA-s dhe për këtë do t’ju njoftojmë në ditët në vazhdim”, thuhet nga ASA në njoftim. Ndërkaq që këshilli shkencor i Institutit të Arkeologjisë - ASA shprehet në deklaratë se kërkimi arkeologjik në vendin tonë i ka paraprirë krijimit të institucioneve nga ana e shtetit shqiptar dhe nuk i përket asnjë individi të së shkuarës, të së tashmes apo të së ardhmes, dhe si i tillë do të vazhdojë të ekzistojë, pavarësisht situatave politike që krijohen. Përmes deklaratës këshilli shkencor shprehet se kërkimet e Institutit të Arkeologjisë që mbulojnë pothuajse tërë territorin shqiptar dhe të gjitha periudhat historike, vetëm apo në bashkëpunim me universitete dhe qendra kërkimore të huaja, sipas modeleve dhe parimeve ndërkombëtare në arkeologji dhe larg subjektivizmave në shkencë, kanë sjellë rezultate të jashtëzakonshme. “Ky institut ka pasur dhe ka si parim pune lirinë akademike të secilit studiues. Duke gëzuar lirinë e fituar në kërkim shkencor, studiuesit e IA-së prej dekadash tashmë nuk e bazojnë aktivitetin e tyre mbi teza të paracaktuara dhe të imponuara, por mbi problematika të cilat studiohen dhe argumentohen. Ky institut ka mbështetur lirinë e kërkimit shkencor në rezultatet e gërmimeve që vijnë nga terreni, duke iu shmangur populizmave politikë për efekte lokale apo interesa të momentit. Niveli i punës sonë ka qenë dhe mbetet profesionalizimi, i matshëm nëpërmjet konferencave dhe botimeve ndërkombëtare, platformat e vërteta të përballjes shkencore”, thuhet nga këshilli i IA. Këshilli shkencor vijon më tej se Instituti i Arkeologjisë falë Shkollës së Doktoraturës dhe bashkëpunimit me universitetet perëndimore në kuadër të projektit Erasmus + ka përgatitur arkeologë dhe studiues të rinj me nivel bashkëkohor.