Anastas Kostandini nis punën për krijimin e një mozaiku

 Piktori i njohur Anastas Kostandini vazhdon punën me krijimtarinë e tij në studio. Me një aktivitet të vlerësuar prej vitesh, piktori Kostandini shprehet se tani po punon për një vepër në qytetin e tij. “Së shpejti një vepër publike për qytetin tim”, shprehet ai. Në atelienë e piktorit pogradecar Anastas Kostandini "Taso", i cili prej disa javësh ka nisur punën për krijimin e mozaikut mural me motivet e paftës ilire të zbuluar në Selcën e Poshtme ishte dhe kryetari i Bashkisë Pogradec, Ilir Xhakolli. Kjo murale pritet që të ekspozohet në një nga pjesët kryesore të qytetit të Pogradecit. Pafta, e cila daton në shek. III para Krishtit është e zbukuruar me një skenë luftimi ku luftëtarët ilirë mposhtin armikun, e ndërthurur kjo me elementet mitologjike, siç janë dragoi, grifoni, peshku dhe zogjtë. E gjithë skena e treguar në këtë artifakt është një interpretim i legjendës së Kadmit, i cili pasi i ndihmoi enkeleasit të triumfonin mbi armiqtë, u shndërrua në një dragua. Anastas Kostandini, i mbiquajtur Taso, është një piktor, mozaist, vizatues, grafist, ilustrator i mirënjohur. Me ekspozita të ndryshme brenda dhe jashtë vendit, në vitin që lamë pas në muajin gusht ai hapi për publikun në qytetin e tij të lindjes Pogradec ekspozitën retrospektivë  “Taso-Gravura”. Piktori i njohur pogradecar prezantohej për herë të parë me një ekspozitë personale në grafikë. Atë kohë ai u shpreh se në fillim të viteve ‘80, gravura si teknikë u zhvendos nga linoleumi në pllaka druri (ksilografi), çka e lejoi një tjetër përqasje. “Prej shumë kohësh merrem me këtë gjini pa të cilën do të isha i paplotë”, tha piktori. Anatas Kostandini (Taso) lindi në Pogradec. Në 1978 u diplomua në Akademinë e Arteve të bukura në Tiranë, i specializuar për art monumental. Është një nga bashkë autorët e mozaikut “Shqipëria”, në fasadën e Muzeut Historik Kombëtar, që tashmë është në restaurim.