Ansambli Popullor, një koncert me veprat më të bukura nga folklori dhe trashëgimia jonë kombëtare

Veprat më të bukura të folklorit tonë erdhën me interpretimin e artistëve të Ansamblit Kombëtar të Këngëve dhe Valleve Popullore. Koncerti u zhvillua për festat e nëntorit, ku dhe artistët e Ansamblit Popullor iu bashkuan festimeve. Një program i pasur artistik në këtë koncert, ku pas Tiranës sot artistët do të jenë për publikun në Ulqin. Vallja “Festë të madhe ka sot Shqipëria”,  “Ditë feste në Tiranë”, “Vallja e Rugovës”, këngët “Fryni era u çel taraba”, “Çik Tropoje”, “Legjenda e urës” ishin disa prej pjesëve të programit artistik, që sollën artistët e Ansambli Popullor me drejtues artistik Sokol Marsin në këtë koncert. Drejtori artistik Sokol Marsi shprehet se Ansambli Popullor shkon në Ulqin-Mal i Zi, në kuadër të 110- vjetorit të Pavarësisë. Programi artistik në Tiranë, që ishte me veprat më të bukura nga folklori dhe trashëgimia jonë kombëtare do të jetë edhe në këtë koncert. Programi përmban rreth 17 numra artistikë me një shtirje gjeografike nga të gjithë zonat e Shqipërisë, duke përfshirë edhe këngët solistike dhe korale, vallet simbolike me karakter kombëtar, kabanë dhe polifoninë e jugut. Në programin artistik të koncertit në Ulqin do të marrin pjesë orkestra e Ansamblit Popullor, trupa e valles dhe grupi koral, solistët e ansamblit, si dhe grupi polifonik.

 Artistët e ansamblit

Koncerti me artistët e Ansamblit Kombëtar të Këngëve dhe Valleve Popullore erdhi në vijim edhe të aktiviteteve të Javës Kulturore Kombëtare, që ka nisur më parë. Por më parë artistët ishin me shfaqjen “Trimat e Jutbinës” në skenë, ku Ansambli Kombëtar i Këngëve dhe Valleve Popullore nuk mungoi në ditët e tetorit edhe në "Balkan Festival Kumanovë", në cilësinë e të ftuarit të nderit. Për rreth 30 vite ansambli i kishte munguar publikut të Kumanovës, i cili duartrokiti gjatë dhe me shumë dashuri programin artistik të artistëve tanë. Me pjesëmarrjen e orkestrës të Ansamblit Popullor, trupa e valles, grupi koral, solistët dhe grupi polifonik i Ansamblit Popullor erdhi një shfaqe e larmishme e pjesëve më të bukura nga folklori muzikor shqiptar me një përfshirje gjeografike nga të gjitha zonat e Shqipërisë. Ansambli Kombëtar i Këngëve dhe Valleve Popullore ose Ansambli Shtetëror, është krijuar në vitin 1957 si ansambël profesionist. Ky ansambël përbëhet nga solistët këngëtarë, orkestrina, grupi i valleve dhe kori. Qëllimi i AKVP-së është në përpunimin, zhvillimin dhe përhapjen e thesarit folklorik të Shqipërisë. Këtu përfshihen pasuritë e mëdha folklorike vokale, instrumentale, koreografike dhe kostumografike, që variojnë nga zona në zonë, duke krijuar një koloritet motivesh. Folklori shqiptar shquhet për origjinalitetin, lashtësinë dhe shumëllojshmërinë e gjinive artistike. Zonat e shumta etnografike kanë veçantitë e veta në këngët, vallet, kostumet, ritet e zakonet.