AQSHF: ‘Gjurmë në kaltërsi’, një nga produksionet me buxhetin më të lartë në Kinostudio

Filmi "Gjurmë në kaltërsi" është prodhim i vitit 1981. Arkivi Qëndror Shtetëror i Filmit shprehet se ky prodhim kinematografik shqiptar kishte një nga buxhetet më të larta të kohës dhe u vu në dispozicion dhe flota e aviacionit luftarak. “A e dini se filmi "Gjurmë në kaltërsi" ishte një nga produksionet me buxhet më të lartë të realizuar nga Kinostudio, edhe pse për të u vu në dispozicion e gjithë flota e aviacionit luftarak dhe avionët MIG, për të cilët u deshën qindra litra karburant për të realizuar dublat gjatë xhirimeve. Regjia Saimir Kumbaro, skenari Llazër Çuçi, operator Lionel Konomi dhe muzika Limos Dizdari”, thuhet në materialin e AQSHF për këtë film. Aktorë në role ishin Reshat Arbana, Xhevdet Feri, Fitim Makashi, Hysen Bashkhysa, Stavri Shkurti, Gjergji Lala, Bep Shiroka, Besim Kurti, Gjergj Spaho, Zef Deda, Gani Disha, Kastriot Çollaku, Donika Fifa, Antoneta Papapavli. Në film, Astriti një pilot i ri, sapo ka dalë nga bankat e shkollës së aviacionit, arrin disa rezultate, por emocionohet gjatë stërvitjes. Me ndihmën e komandant Markos dhe të shokëve, si edhe me vullnet të fortë ai arrin suksesin. Koleksioni i AQSHF është krijuar kryesisht nga fondi i depozitës legale të prodhimit shqiptar të filluar prej vitit 1947, i cili ka qenë kryesisht prodhim i një qendre të vetme shtetërore, Kinostudios "Shqipëria e re", aktiviteti i së cilës fillon në vitin 1952 dhe përfundon në vitin 1992. Përveç koleksionit në pelikulë, në origjinalin e vet të kopjes negative dhe në kopje arkivale në pozitiv, AQSHF ruan edhe materiale të tjera të historisë së krijimit filmik, si skenarin letrar, skenarin regjisorial, listën e montazhit, fotografi, negativa te fotove, materiale të promovimit të veprës, partiturat e muzikës së filmave dhe posterat e tyre.