Arkeologët prezantojnë kërkimet e tyre në konferncën në qytetin e Ohrit

Në kuadër të projektit “Common Cultural Heritage”, u organizua në qytetin e Ohrit konferenca ndërkombëtare “Prehistoria në Ballkan: Trashëgimia e përbashkët kulturore”. Ky projekt u financua nga "Western Balkan Fund" dhe u koordinua në partneritet të përbashkët nga Instituti i Arkeologjisë (arkeologia Edlira Andoni ishte organizatore në emër të IA-s), Qendra për Kërkime Prehistorike, Shkup dhe Fakulteti i Filozofisë, Beograd. Konferenca në datat 25-26 nëntor u fokusua në trashëgiminë kulturore të përbashkët prehistorike, promovimin dhe mbrojtjen e saj në nivel kombëtar dhe ndërkombëtar. Akademia e Studimeve Albanologjike shprehet se dita e parë e konferencës iu kushtua prezantimeve të studentëve nga Departamenti i Trashëgimisë Kulturore dhe Arkeologjisë të Fakultetit Histori-Filologji në Tiranë, nga Departamenti i Arkeologjisë të Fakultetit të Filozofisë së Beogradit dhe Departamenti i Arkeologjisë të Fakultetit të Filozofisë në Shkup dhe Shtip. “Studentët prezantuan përvojat e punës në terren, laborator dhe e vizitave që ata patën në institucione të ndryshme kulturore dhe muzeore në kuadër të shkollës verore në Shqipëri, Serbi dhe Maqedoninë e Veriut. Gjithashtu, ata prezantuan dhe hulumtime që lidhen me aspekte të ndryshme kulturore dhe sociale të periudhave të prehistorisë nga territori i Shqipërisë, Serbisë dhe Maqedonisë së Veriut”, thuhet nga ASA. Dita e dytë e konferencës u fokusua në prezantimet e studiuesve të prehistorisë ballkanike. Arkeologë të institucioneve të ndryshme shkencore nga Shqipëria, Serbia dhe Maqedonia e Veriut prezantuan kërkimet e tyre lidhur me perspektivat rajonale prehistorike, zbulimet më të fundit në periudhën e neolitit: aktivitetet ekonomike, tipologjitë e banesave dhe llojet e vendbanimeve, studime për qeramikën, studime për peizazhin prehistorik, ritualet, datimet absolute, si dhe aspekte të tjera të neolitizimit të Ballkanit.