Arkitektura në Salzburg, një ekspozitë në muzeun “Onufri”

“Arkitektura në Salzburg nga baroku në kohën moderne” titullohet ekspozita, që u çel në muzeun “Onufri” në Berat. Ekspozita është organizuar nga universiteti “Polis” dhe Ambasada Austriake në Tiranë, në bashkëpunim me Qendrën Muzeore Berat, kurator ph. d. Saimir Kristo. Në përshkrimin e ekspozitës me fotografi, thuhet se deri në fillim të shekullit të 19-të, Salzburgu ishte në një situatë të veçantë politike si një kryepeshkopatë e pavarur, e cila ishte shumë më e gjerë se Provinca e sotme Austriake. “Për shekuj me radhë, princ-kryepeshkopët në pushtet, duke ndjekur shembullin e Romës, porositën arkitektët italianë të projektonin qytetin rezidencial të Salzburgut (dhe të gjithë shtetit Papal), duke e bërë Salzburgun një qytet të shquar barok. Përveç edicioneve të shquara të ngritura nga sundimtarët kishtarë - kalaja, katedralja dhe kisha të tjera, rezidenza, shtëpitë e veçanta të bashkangjitura në një katedrale ose kishë të madhe (dhe shtëpitë e shumta të qyteteve që u përkasin manastireve më të mëdha) dhe pallatet Mirabel dhe Helbrun - ka disa rezidenca të konsiderueshme aristokratike, të cilat si shtëpitë e qytetit me oborret dhe pasazhet e tyre mbresëlënëse, janë mjaft solide, me pak zbukurime”, thuhet në përshkrim të ekspozitës “Arkitektura në Salzburg nga baroku në kohën moderne ”. Arkitekti i shquar i Barokut Johan Bernhard Fiser von Erlah projektoi disa prej kryeveprave më të shquara të Barokut në qytetin dhe provincën e Salzburgut të sotëm; vepra e tij kryesore, Kisha Universitare është një nga kishat kryesore barokene në Austri. Për shkak të numrit të kufizuar të pjesëmarrësve ceremonia e hapjes së ekspozitës u ndoq në linkun : https://meet.google.com/pqa-nxnw-sdx. Ekspozita “Arkitektura në Salzburg nga baroku në kohën moderne” do të qëndrojë deri më datë 13 prill në muzeun “Onufri”, në qytetin e Beratit. Ekspozita vjen në vijim të aktiviteteve dhe veprimtarive që zhvillohen në muzeun “Onufri”, në Berat. Muzeu kombëtar “Onufri” në Berat është përshtatur në ambientet e kishës “Fjetja e Shën Mërisë” në kala, që prej 27 shkurtit të vitit 1986. Muzeu mban emrin “Onufri”, njëri prej kryemjeshtrave të pikturës shqiptare të shek. XVI.