Kërko Për

Agjencia e Lajmeve SOT NEWS

Agjencia e Lajmeve SOT NEWS Lajme nga Shqiperia, Kosova, Rajoni dhe Bota, Politike, Kronike, Aktualitet, Dossier, Kulture, Sport

Artistët e skenës dhe ekranit, peticion kryeministrit: Jemi të dekurajuar, rregulloni kuadrin ligjor dhe afroni buxhetin me Maqedoninë

Postuar: 15/11/2017 - 07:52

Sindikata e Artistëve të Skenës dhe Ekranit ka hartuar një peticion drejtuar kreut të qeverisë për rritjen e buxhetit të artit dhe kulturës, pasi është 4 herë më i vogël se në Maqedoni.  Kryesia e përkohshme e SASE vlerëson se duhet një përpjekje për të rritur buxhetin e kulturës për vitin 2018 tani që Kuvendi po shqyrton Projekt-Buxhetin e Shtetit. Për këtë qëllim SASE vendosi të hartojë një peticion drejtuar kryeministrit. 

“Kjo nuk është një betejë vetëm e SASE-s dhe nuk i shërben vetëm asaj”, thuhet në materialin e përgatitur nga SASE.  Në peticionin e datës 12 nëntor drejtuar kreut të qeverisë Edi Rama SASE  bën me dije se artistët dhe punonjësit e sektorit të arteve dhe kulturës në Shqipëri, janë thellësisht të shqetësuar për gjendjen e infrastrukturës, financave dhe kuadrit ligjor të këtij sektori. “Problemet e akumuluara prej 27 vitesh janë bërë pengesë shumë serioze për zhvillimin normal të artit dhe kulturës, por edhe dëmtojnë në mënyrë të pakthyeshme të ardhmen e tyre”, thuhet në peticion. SASE pohon se sektori i arteve dhe kulturës, që sot në perëndim thirret "industri krijuese", nuk është dhe nuk duhet të konsiderohet si shpërdorues i fondeve publike. “Përvoja e Europës së qytetëruar na mëson se aty ku ka më shumë investime publike në kulturë dhe art, aty ka më pak kriminalitet, qytetarët ndjehen më të motivuar për punë, gëzojnë shëndet më të mirë dhe nuk kanë dëshirë të largohen nga qyteti apo vendi, turizmi lulëzon, imazhi i vendit është më i mirë dhe niveli i investimeve më i lartë. Për këto arsye, qeveritë laburiste britanike të Tony Blair dhe Gordon Brown, e rritën financimin e arteve me 35 përqind çdo vit, për 13 vjet me radhë”, vijon peticioni drejtuar kryeministrit të vendit.

Ndjehemi të turpëruar janë prishur teatrot

Sindikata e Artistëve të Skenës dhe Ekranit ndërkohë që po pret dhe legalizimin e saj, vijon se 27 vjet më parë, artistët ishin ndër të parët që iu bashkuan thirrjes së studentëve "E duam Shqipërinë si gjithë Europa", por në tre dekada qeveritë kanë dekurajuar artistët. “Të gjithë shpresuam se arti dhe kultura nuk do të ishin më "rripa transmisioni të partisë", por një sektor dhe komunitet i respektuar i shoqërisë, i trajtuar me dinjitet nga qeveria. Fatkeqësisht, në këto pothuaj tri dekada, qeveritë kanë bërë gjithçka për t'i dekurajuar artistët dhe punonjësit e artit e kulturës, për t'ua vështirësuar jetën dhe punën, duke i detyruar të ndryshojnë zanat, apo më keq akoma, të emigrojnë pa kthim jashtë vendit”, pohojnë artistët. Sipas SASE buxheti për kulturën u reduktua derisa arriti një nivel më i ulët se ai i Kosovës, ndërkohë që shumica e nismave ligjore të premtuara nuk u materializuan.

“Me keqardhje vërejmë se situata në këtë sektor nuk ka qenë kurrë më e keqe se sot. 27 vjet pasi thirrëm "E duam Shqipërinë si gjithë Europa" ne e gjejmë veten aq larg Europës, saqë thirrja jonë sot është "E duam Shqipërinë si Maqedonia". Po, i nderuar z. Kryeministër, sepse Maqedonia fqinje, një vend me popullsi dhe prodhim kombëtar më të vogël se Shqipëria, ka një buxhet për kulturën plot 4 herë më të madh se ai i Shqipërisë: 63 milion euro, kundrejt 15 milion euro (2 miliard lekë në Projekt-buxhetin 2018)”, thuhet në peticion.  SASE fton artistët dhe punonjësit e sektorit të art-kulturës të nënshkruajnë dhe vijon se në Maqedoninë fqinje ka investime të vazhdueshme në infrastrukturë dhe papunësia e artistëve nuk ekziston. “Duhet të ndjehemi të gjithë të turpëruar për faktin se në periudhën e tranzicionit në Maqedoni janë ngritur dy teatro shqiptare (në Tetovë e Kumanovë), ndërsa në Shqipëri janë mbyllur dy teatro shqiptare (në Berat e Peshkopi). Për sa më lart, ne kërkojmë që Shqipëria të ketë, në vitin 2018 e në vazhdim, një buxhet të barabartë me Maqedoninë. Ne kërkojmë që i gjithë kuadri ligjor të përditësohet dhe plotësohet përmes një dialogu të institucionalizuar qeveri-komunitet, bazuar në përvojat më të mira perëndimore dhe jo të imponohet nga lart poshtë, të shfrytëzohet për fasadë dhe për të ruajtur këtë status quo”, përfundon peticioni i artistëve të skenës dhe ekranit.

Nga Julia Vrapi

 

 

/Agjensia e Lajmeve Sot News/

Na Beni Like Ne Facebook: 
Total votes: 35

Lajme nga e njejta kategori

Postuar: 18/09/2018 - 07:57

Teatri Kombëtar Eksperimental “Kujtim Spahivogli” bën me dije se çel stinën teatrore të shfaqjeve për fëmijë në datat 22 dhe 23 shtator, me dy premierat më të reja "Motër e vëlla"dhe "Librar

Postuar: 18/09/2018 - 07:55

Janë pesë vepra premiera shqiptare që do të vijnë për publikun në skenën e Teatrit Metropol gjatë

Postuar: 18/09/2018 - 07:51

Zëri i artistëve për probleme të ndryshme sipas tyre nuk është dëgjuar nga Ministria e Kulturës.

Postuar: 16/09/2018 - 08:16

Vitit kulturor Austri- Shqipëri po vijon me aktivitete dhe veprimtari të ndryshme artistike dhe k

Postuar: 16/09/2018 - 08:13

Historia e Skënderbeut realizuar në pikturë për publikun vjen në ekspozitën me veprat e piktorit

Postuar: 16/09/2018 - 08:10

Piktori Anastas Kostandini është nga emrat më të vlerësuar në art brenda dhe jashtë vendit.

Postuar: 15/09/2018 - 07:30

Nga e hëna e 17 shtatorit deri më 22 shtator do të zhvillohet edicioni i trembëdhjetë i Festivali