Artistët me një mbrëmje kushtuar divës së artit operistik botëror Maria Callas, jeta dhe veprimtaria në një dokumentar

Maria Callas ishte një nga këngëtaret më të njohura dhe më me ndikim të operas të shekullit të 20-të. Një mbrëmje e veçantë dedikuar divës së artit operistik botëror Maria Callas, në 99-vjetorin e lindjes së saj bëri bashkë artistët. Qendra për Hapje dhe Dialog (COD) në bashkëpunim me pianisten Ardita Bufaj organizoi eventin në kujtim të 99-vjetorit të lindjes së  Maria Callas, ku nuk mungoi edhe një dokumentar kushtuar sopranos. COD shprehet se ky event solli në vëmendjen e publikut, e veçanërisht të rinjve, repertorin e artistes në fjalë, i cili varionte nga operat serioze klasike deri te veprat belkanto të Donizettit, Bellinit dhe Rossinit; te kryeveprat e Verdit dhe Puçinit. Talenti i saj ndërkombëtar bëri që ajo të cilësohej si “La Divina”. Dokumentari i shfaqur në sallën “Forum”, sipas COD ngacmoi kureshtjen e të pranishmëve mbi atë që do të ishte “lufta” midis gruas Maria dhe divës Callas; një histori e ndërlikuar jashtë skenës që luhej me po aq dramë të zjarrtë sa edhe operat që ajo këndonte. Në përfundim të diskutimit mbi jetën dhe veprimtarinë e artistes, tri studente të Universitetit të Arteve interpretuan arie solo nga partiturat legjendare të Maria Callas, të shoqëruara në piano. Ideuar dhe nën moderimin e pianistes së njohur Ardita Bufaj në këtë mbrëmje ishin të ftuar personalitete të ndryshme të artit dhe më gjerë, si Maria Francesca Siciliani, vajza e ish drejtorit të teatrit “La Scala”, regjisore dhe e pagëzuar nga Maria Callas, sopranoja Edit Mihali, kompozitori Robert Radoja, muzikologjia Mikaela Minga, soprano Ramona Tullumani, etj. 

Aktiviteti i sopranos

Maria Callas lindi më 2 dhjetor 1923. Është sopranoja greko-amerikane më me influencë e shekullit të 20-të. Shumë kritikë vlerësuan teknikën e saj bel canto, zërin e gjerë dhe interpretimet dramatike. Sipas certifikatës së lindjes, emri i saj është Sophia Kalos, e lindur në Manhattan nga dy prindër grekë dhe e pagëzuar më pas me emrin Anna Maria Sofia Kalogeropoulou.  Në materiale rreth jetës së saj, thuhet se Callas mori edukimin muzikor në Athinë. Më pas u regjistrua në Konservatorin e Athinës, por pa sukses. Në audicione, me zërin ende të pastërvitur dështon duke mos arritur të lërë përshtypje të mirë te drejtori i konservatorit, i cili refuzon ta regjistrojë. Pas kësaj merr mësime private këndimi dhe kështu nis rruga e gjatë drejt këndimit lirik. Në kohën e Callas-it, bashkëkohësit dëshironin zëra perfekt. Shumë soprano ishin të përqendruar te bukuria e zërit më shumë se sa te interpretimi. Por Maria solli ndryshimin, diçka të pazakontë. Ajo nuk interesohej aq shumë për bukurinë vokale se sa për interpretimin dramatik. Megjithatë edhe zëri i saj ishte i mahnitshëm. E filloi karrierën me Puçinin dhe Toskën pikërisht në Greqi, në vitin 1942, me sukses të jashtëzakonshëm, falë shpirtit të sakrificës (studionte 12 orë në ditë) dhe punës sfilitëse. Sopranoja Maria Callas u nda nga jeta më 16 shtator 1977, Paris, Francë.