ASH: Vendim që u jep dy institucioneve mundësinë për zhvillimin në një nivel të ri të shkencave albanologjike

Vendimi i qeverisë për rikthimin e Akademisë së Studimeve Albanologjike pranë Akademisë së Shkencave të Shqipërisë u përshëndet nga kjo e fundit. Akademia e Shkencave shprehet se ky vendim u jep të dy institucioneve mundësinë për zhvillimin në një nivel të ri të shkencave albanologjike. “Akademia e Shkencave e Shqipërisë përshëndet vendimin e qeverisë për bashkimin e saj me Akademinë e Studimeve Albanologjike, duke e konsideruar atë si një vendim që u jep të dy institucioneve mundësinë dhe përgjegjësinë për zhvillimin në një nivel të ri të shkencave albanologjike. Statusi i ri që u jepet instituteve shkencore të albanologjisë si pjesë elitare e sistemit të kërkimit shkencor, pas një periudhe veprimtarie jo në përputhje me ligjet në fuqi, do të forcojë dukshëm edhe vetë statusin e punonjësve shkencorë”, thuhet në deklaratën e Akademisë së Shkencave. Deklarata e Akademisë së Shkencave vijon se ky vendim  shpreh rritjen e interesit e të angazhimit të qeverisjes për të rritur dhe evidencuar financimin dhe investimet për kërkimin shkencor, ashtu siç po vepron me mbështetjen për tri projektet madhore në albanologji e për ngritjen e njësive të reja kërkimore-shkencore me impakt kombëtar. Deri në vitin 1972 në vendin tonë vepronin 25 institucione kërkimore-shkencore. Në këto kushte u bë e domosdoshme nevoja e ngritjes së Akademisë së Shkencave si një institucion kërkimor-shkencor kombëtar. Kështu, më 10 tetor 1972 u vendos krijimi i Akademisë së Shkencave të Shqipërisë. Mbledhja e parë e Asamblesë së Akademisë së Shkencave u mbajt më 25 janar 1973. Në fillimet e saj akademia kishte 17 anëtarë të rregullt dhe 5 anëtarë korrespondentë; ajo funksiononte me një varg institutesh të shkencave shoqërore dhe albanologjike, si dhe të shkencave natyrore e teknike.