Baleti “Muzg” në TKOB, një krijim i lidhur me përjetimet tona

Baleti "Muzg" erdhi tre net plot emocione, nga trupa e baletit të Teatrit Kombëtar të Operës dhe Baletit dhe me koreografi nga balerini i mirënjohur përtej kufijve Eno Peçi. “Një krijim i lidhur me përjetimet tona, që ndërthuret bukur edhe me tingujt e lahutës si pjesë e identitetit tonë. A jemi robër të muzgut, apo jemi vetë muzgu?”, shkruan TKOB në faqen e tij për këtë balet që ishte në skenë mbrëmjet e datave 12, 13 dhe 14 mars. Skenografia dhe kostumografia e kësaj vepre ishte me mbështetjen e Harabel Contemporary Art Platform. Nën koreografinë e balerinit të mirënjohur ndërkombëtarisht, Eno Peçi dhe asistencën në koreografi të Eldad Ben Sasson, kjo shfaqje erdhi në vijim dhe të atyre që janë vënë gjatë kësaj kohe në skenën e TKOB. Pas mbrëmjes së parë të baletit në skenë, TKOB shprehej se “Muzgu” mbuloi gjithë skenën me përjetimin emocional që solli interpretimi mjeshtëror i trupës së baletit, në kërcimin kontemporan fort të dëshiruar nga publiku, kuruar deri në detaje nga koreografi i mirënjohur përtej kufijve shqiptarë, Eno Peçi. Në aktivitetin e tij artistik Eno Peçi njihet si i pari balerin shqiptar, i cili performoi live në Koncertin e Vjenës të fillim vitit 2014. Në vitet 1994-1998 studion në shkollën e baletit në Tiranë. Më 1998-2000 ndjek shkollën shtetërore të baletit në Vjenës. Në vitin 2000 ai u bë anëtar i Teatrit të Operës e Baletit të Vjenës. Ndër pjesët e tij më të rëndësishme numërohen tek “Spartaku” i Renato Zanelas dhe “Impresionet e Çajkovskit” të Ivan Kavalaris, “Mjekërkuqi”, “Liqeni i mjellmave” të Rudolf Nurejevit, “Maçoku me çizme” dhe “Pas de qatre” te “Bukuroshja e fjetur” e Peter Wright, “Kopelia”, “Romeo dhe Zhuljeta”, “Onegini”, “Ashtu siç ju pëlqen”, “Borëbardha”, “Arrëthyesi”, etj.