Ben Blushi me “41 Sekrete” shpallet fituesi i çmimit "Lumo Skëndo"

Shkrimtari Ben Blushi me “41 Sekrete” u shpall fituesi i çmimit "Lumo Skëndo". Çmimi “Lumo Skëndo” i themeluar nga Qendra Kombëtare e Librit dhe Leximit për veprën më të mirë në publicistikë dhe eseistikë, këtë vit shënoi edicionin e tij të dytë. Juria për vlerësimin këtë vit përbëhej nga Belina Budini (kryetare) dhe anëtarë studiuesi Uran Butka, drejtoi i Arkivës, Ardit Bido, pedagogia Teuta Toska dhe gazetarja Monika Stafa. Çmimet u ndanë në një ceremoni ku ishte e pranishme ministrja e Kulturës Elva Margariti, kryetari i Qendrës Kombëtare të Librit dhe Leximit Alda Bardhyli, autorë, studiues, etj. Ministrja Margariti ndau në rrjete sociale foto të kësaj ceremonie çmimesh dhe shprehet se këtë vit ishte e pranishme dhe fituesja e edicionit të kaluar. “Ben Blushi me “41 Sekrete” shpallet fituesi i çmimit "Lumo Skëndo"! U mblodhëm sërish nën një emër të madh si ai i mendimtarit dhe bibliofilit Lumo Skëndo për të vlerësuar veprën më të mirë në lëmë të publicistikës dhe eseistikës për vitin 2022. Kënaqësi të kishim mes tonë edhe fituesen e edicionit të shkuar, Lea Ypi për të kaluar "stafetën" e një çmimi që vlerëson sa mprehtësinë e mendimit aq edhe bukurinë e gjuhës. Urime finalistëve: Aleksandër Çipa, Eleni Laperi, Evarist Beqiri e Mero Baze për përpjekjen e përditshme në fushën e letrave dhe jurinë e nderuar e përbërë nga Belina Budini, Uran Butka, Teuta Toska, Ardit Bido dhe Monika Stafa për përkushtimin”, shprehet ministrja e Kulturës në rrjete sociale. Kryetarja e jurisë Belina Budini tha më herë se edicioni i dytë i çmimit “Lumo Skëndo” nga Qendra Kombëtare e Librit dhe Leximit është një lajm i mirë për autorët, që do të vlerësohen kryesisht në gjinitë e publicistikës dhe eseistikës. Qendra Kombëtare e Librit dhe Leximit ftoi botuesit më parë të dërgonin pranë saj botimet në këto dy gjini për vitin 2022.