BREAKING NEWS

E trishtë! Valentina Leskaj humb njeriun e shtrenjtë nga koronavirusi: Sot është një ditë shumë e vështirë për mua

E trishtë! Valentina Leskaj humb njeriun e shtrenjtë nga koronavirusi:
x

Kultura

Degradimi i filmit shqiptar, AQSHF përzgjedh “Ballë për ballë” për restaurim në Hungari

Degradimi i filmit shqiptar, AQSHF përzgjedh “Ballë për

Filmi artistik shqiptar “Ballë për ballë” prodhuar në vitin 1979 pritet ti nënshtrohet procesit të restaurimit. Arkivi Qendror Shtetëror i Filmit mes filmave të tjerë për të cilët është pohuar se kërkojnë ndërhyrje, ka përzgjedhur këtë film që mban emrin e regjisorëve Kujtim Çashku dhe Pirro Milkani.

Vlerësuar si një nga prodhimet më të rëndësishme të ish Kinostudios, për këtë projekt ka nisur puna në AQSHF, ndërsa bëhet e ditur se mes filmave të tjerë ky prodhim kinematografik u përzgjodh sepse kishte ngjyra të dekompozuara, ku tashmë është bërë dhe një test i tij. Restaurimi  i filmave ka marrë gjatë kësaj kohe shumë vëmendje, ndërsa deri tani janë restauruar disa nga titujt e njohur të kinematografisë shqiptare, por duket se për këtë proces ka ende shumë për të bërë. Projekti i radhës për restaurimin e filmit “Ballë për ballë” pritet të kryhet falë një bashkëpunimi me “Hungarian FilmLab” Budapest, ndërsa më herët nga ky bashkëpunim u restauruan dhe filmat “Përrallë nga e kaluara” dhe “Përjetësi” të regjisorit të mirënjohur, Dhimitër Anagnosti. Filmi “Ballë për ballë”, një nga filmat e rëndësishëm të fondit filmik të AQSHF-së, i cili rrezikon dekolorimin total të ngjyrave u përzgjodh mes titujve të filmave si: “Liri a vdekje”, “Vajzat me kordele të kuqe”, “Në shtëpinë tonë”, të cilët gjithashtu kanë nevojë për një ndërhyrje urgjente. Problematika me këta filma është që në kohën kur ata janë prodhuar. Të realizuar para disa dekadash në kushtet e atëhershme, sot këta filma përballen me jo pak probleme. Deri më tani për shkak të pamundësive të fondeve, AQSHF ka bërë të mundur restaurimin e disa filmave tituj të njohur të kinemasë shqiptare, dhe kjo falë bashkëpunimit me të huajt, pasi buxhetet në vend nuk arrijnë dot ta realizojnë këtë proces të rëndësishëm për jetëgjatësinë e filmit. Nga bashkëpunimet e AQSHF deri tani janë restauruar filmat si “Skënderbeut”, “Nëntori i dytë”, “Tomka”, etj.

 Historiku i filmit “Ballë për ballë”
 
“Ballë për ballë” është një film artistik i metrazhit të gjatë dhe i prodhuar në vitin 1979 nga ish Kinostudio Shqipëria e Re, dhe një nga filmat që ka angazhuar mera të njohur të kinemasë. Filmi me regji nga Kujtim Çashku, Pirro Milkani bazuar në romanin e Ismail Kadaresë “Dimri i madh” është realizuar me muzikë nga Feim Ibrahimi. Besnik Bermema ishte përkthyes në konferencën e partive komuniste të mbajtur në Moskë në vitin 1961. Ai ishte dëshmitar i thyerjes më të madhe midis dy partive komuniste që i përkisnin respektivisht një kombi të madh dhe një kombi të vogël. Ngjarjet dramatike në konfliktin ushtarak ndodhin në një bazë detare në territorin shqiptar në Pashaliman, të cilën Sovjetikët nuk arritën dot ta përvetësonin. Dy regjisorët Çashku dhe Milkani në film kanë përzgjedhur aktorë Bujar Lako, Mevlan Shanaj, Agim Shuke, Thimi Filipi, Raimonda Bulku, Arben Imami, Kadri Roshi, Sulejman Pitarka, Timo Flloko, Katerina Biga, Sheri Mita, Ligoraq Rira, Edmond Budina, Piro Kita, Ilir Bozo, Stavri Shkurti, Lola Gjoka, Gjergj Antoniu, Erik Paci, Melpomeni Çobani. Filmi merr çmimin e parë në Festivalin e IV të Filmit Shqiptar. Aktori Sulejman Pitarka merr kupën e festivalit për rolin e Zheleznovit. Bujar Lako u nderua me kupën e festivalit për rolin e Mujo Bermemës. Nga Julia Vrapi