“Dimri i librave” një vepër që përshfaq realitete bashkëkohore promovohet në QKLL

Shkrimtari Bashkim Hoxha, promovoi në hapësirat e Qendrës Kombëtare të Librit dhe Leximit, romanin e tij të ri “Dimri i librave”. Autorë, studiues, botues dhe më gjerë ishin të pranishëm gjatë aktivitetit, ku u promovua dhe libri më i fundit i shkrimtarit Bashkim Hoxha “Ditari i librave” botuar nga “Onufri”. Një vepër që përshfaq realitete bashkëkohore, nën perceptimin e njerëzve që jetojnë me librin, si një metaforë mbi rëndësinë që ka arti kultura në ridimensionimin shpirtëror e social të kohës që jetojmë. Ky libër në pikëpamje të parë i zymtë, shoqërohet me mjaft ironi, ç’ka i jep lexuesit argëtim edhe pse dominojnë notat pesimiste për krizën shpirtërore dhe kulturore të shoqërisë, e cila në këtë rast është pa kohë. Dozat pesimiste të realitetit vijnë nën prespektivën e një drite gjatë gjithë strukturës narrative, duke zhbërë çdo antivlerë e cila rreket të institucionalizohet. Bashkim Hoxha “Mjeshtër i Madh” është gazetar, dramaturg, skenarist dhe shkrimtar i njohur. Nga dora e shkrimtarit Bashkim Hoxha kanë dalë një radhë veprash si "Dimiri i librave", "Asnjëherë të martën", "Një shaka e vogël me vdekjen", "Duartrokitësit", "Kronikat e Mjegullës", "Gruaja e shiut", "Romancë ditën e krimit", "Lakuriq", "Ground Zero" ( "Dëshmitari i Shkretëtirës"), "Hotel Ballkan", "Mbreti i Vesës", "Mot i keq për dashuri", "Fjalë të ndyra dashurie", "Njeriu tjetër", "Një lolo dhe një mbret", "Ftesë për gjyq", "Këngë dashurie dhe korba", "Qyteti pa dashuri", etj. Romani "Hotel Ballkan" dhe romani "Ground Zero" janë botuar edhe në anglisht nga Wheatmark (Arizona, USA). Bashkim Hoxha në krijimtarinë e tij shquhet për gjetje origjinale dhe këndvështrime interesante. Ai ka fituar disa çmime kombëtare me romanet e tij.