Dita e Flamurit, akrobatja Fiona Rushiti një performancë të veçantë

Akrobatja Fiona Rushiti dhuroi performancë të veçantë për Ditën e Flamurit. E njohur me aktivitetin e saj prej vitesh, në këto ditë festash akrobatja Fiona Rushiti zgjodhi të ngrejë “shqiponjën” te sheshi “Nënë Tereza” në Tiranë. Artistja Rushiti këtë herë për Ditën e Flamurit erdhi me një performancë me të gjitha ngjyrat dhe simbolet kuq e zi, ulur mbi shqiponjën dykrenare. Por për akrobaten Rushiti realizimi i kësaj performance nuk ka qenë i lehtë. “Doja që këtë 28 nëntor të vija si shqiponjë e shqiptarëve, si dhe për të treguar vlerat dhe bukurinë e flamurit tonë. Për mua kjo do të jetë një ndër performancat më të veçanta, dhe më të bukura sepse nisi thjesht si një ide. Ka qenë shumë e vështirë gjithë përgatitja e saj, më kanë dalë shumë pengesa rrugës, saqë mendoja që do e kisha të pamundur ta realizoja”, tregon akrobatja e njohur që dhuroi për publikun këtë performancë. Në Ditën e Flamurit në Tiranë një performancë që mori vlerësime, por akrobatja Fiona Rushiti thotë se përmes saj përcjell dhe mesazhe për shoqërinë tonë. “Mesazhi më i mirë është që të mos harrojmë kush jemi e nga vijmë, mos ta harrojmë gjuhën, kulturën, traditat dhe vlerat që kemi si komb”, thotë ajo. Para festave të nëntorit akrobatja në reagimet e saj e pati paralajmëruar se do të vinte me një performancë të veçantë në Ditën e Flamurit. Fiona Rushiti, një talent i zbuluar që në moshë fare të vogël, me pasion dhe përkushtim ka arritur t’ia dalë. Ka disa vite që po vijon me aktivitetin e saj në Shqipëri, por dhe në Kosovë ku ka marrë shumë vlerësime. Një artiste me performanca spektakolare në vende të ndryshme, e cila edhe pa ndihmën e institucioneve ia ka dalë të ketë një aktivitet të vlerësuar. Në aktivitetin e saj vëmendje ka marrë edhe promovimi i trashëgimisë sonë kulturore. Butrinti, ura monument kulture, kala, etj, janë disa nga zgjedhjet e akrobates së njohur Fiona Rushiti ku ajo ka performuar.