Dokumentari “Bekim Fehmiu”, i cili paraqet copëza dhe histori nga jeta e aktorit të madh shqiptar pas premierës edhe në festivale filmi

Premiera zyrtare e filmit dokumentar kushtuar jetës dhe veprës së aktorit të madh Bekim Fehmiu nën regjinë e Valmir Tertinit u shfaq në Tiranë. Mbrëmjen e së enjtes në kinema Millennium aktorë, regjisorë, skenaristë, artistë të tjerë dhe më gjerë u bënë bashkë në këtë premierë. Ky dokumentar është xhiruar në Kosovë, Shqipëri, Serbi, Kroaci, Bosnjë dhe Hercegovinë, si edhe Itali, prej vitit 2019. Dokumentari, i cili paraqet copëza dhe histori nga jeta e aktorit të madh shqiptar Bekim Fehmiu, është me skenar të Fahri Musliut, ku regjisori Valmir Tertini vjen me këtë projekt në vijim të punës së tij me kinemanë. Dokumentari “Bekim Fehmiu” u përcoll me shumë interes nga të pranishmit, ku nuk mungonin dhe adhurues të aktorit të madh që vinin nga shtete të tjera. Regjisori Tertini thotë se ishte një mbrëmje me premierën më mirë nga sa e kishin imagjinuar, ku për aktorin e madh Bekim Fehmiu në dokumentar flasin Arsim Fehmiu vëllai i tij, bashkëshortja Branka Petriq, aktori Timo Flloko, aktorja Eleonora Giorgi, etj. Mbrëmjen e së enjtes Branka Petriq mungoi në premierë, ku përshëndeti me një video pasi ndodhej me xhirime në Sarajevë. Për dokumentarin “Bekim Fehmiu” regjisori Tertini ka folur dhe më parë, por mbrëmjen e premierës ai mori dhe vlerësime nga të pranishmit për punën e tij. “U ndjeva mirë. Mora komplimente pozitive nga kolegët madje dhe nga ata që ishin të intervistuar në dokumentar. Në premierë kishim të ftuar nga Kosova e Shqipëria, madje dhe adhurues të Fehmiut që erdhën nga Amerika e Kanadaja”, tregon regjisori. Filmi dokumentar është prodhuar nga shtëpia filmike Cinemania- producent Jaklid Gace me financim nga Qendra Kombëtare e Kinematografisë. Por regjisori Valmir Tretini thotë se pas premierës në Tiranë, dokumentari do të shfaqet dhe në festivale. “Pas Tiranës dokumentari do të shfaqet dhe në Kosovë, por nuk e dimë saktësisht a do jetë  premierë në Prishtinë a Prizren. Patjetër dhe në festivale, kjo është gjëja kryesore. Synimi është në festivale pastaj në kinema”, thotë ai.

Puna me filmin

Bekim Fehmiu ishte aktori i parë shqiptar i filmit dhe i teatrit, i cili ka luajtur me sukses në filmat dhe skenat e gjithë hapësirës së ish-Jugosllavisë, një nga personalitetet që ka lënë gjurmë në kinematografinë ballkanike, mbetet ndër figurat më të dalluara të kinematografisë shqiptare. Në dokumentar rrëfehen shumë figura të njohura, vëllai i tij tregon rrënjët e familjes, Bekimin si fëmijë, si student e deri tek kulmi i tij prej një aktori të njohur ndërkombëtarisht. Branka për dashurinë, për karakterin e tij përkushtimin, ajo qan, qesh e këndon në dy rrëfime ekskluzive njëherë me të folur e pastaj, duke treguar sendet e Bekimit në valixhe. Eleonora Giorgi tregon prapaskenat e xhirimeve, pastaj artistët si Timo Flloko, Piro Milkani, Enver Petrovci, Goran Markovic, Roza Anagnosti, Milazim Salihu, etj, rrëfehen për momente specifike. “Mendoj që deri më tani figura e Bekim Fehmiut ka qenë e keqkuptuar dhe dokumentari e merr një figurë konkrete të Bekimit si në aspektin e vdekjes po ashtu dhe mënyrën se si ai u bë i njohur e deri tek kulminacioni i tij dhe arriti deri në Hollivud”, tregon Tertini për atë që sjell dokumentari. Bekim Fehmiu ishte një aktor shqiptar nga Kosova. Lindi në Sarajevë më 1 qershor 1936 dhe vdiq më 15 qershor 2010 në Beograd, Serbi. Regjisori Valmir Tertini njihet me filmat e tij me tema të guximshme si “Vulë” për punonjësen e pandërgjegjshme të ambasadës në Kosovë, i cili ka sjell 13 çmime ndërkombëtare, i shfaqur në më shumë se 60 festivale filmi. Pastaj filmi “Tradhti me letra” për martesat për dokumentacione, i cili ka sjell 11 çmime. Pas dokumentarit të gjatë artistik për Bekim Fehmiun, puna e tij tashmë është e fokusuar te një tjetër projekt me kinemanë. Valmir Tertini është profesor i filmit në “World Academy of Tirana”. Pak kohë më parë regjisori Valmir Tertini u bë anëtar i Akademisë Evropiane të Filmit.