“Drejt Pavarësisë” bën bashkë studiues e specialistë për historinë në MHK

Në kuadër të "Nëntorit të flamurit" u zhvillua tryeza e rrumbullakët “Drejt Pavarësisë” organizuar nga Muzeu Historik Kombëtar në bashkëpunim me Qendrën Kombëtare të Librit dhe Leximit. Në konferencë ishin të ftuar specialistë të fushës nga Instituti i Historisë pranë Akademisë së Studimeve Albanologjike. Dr. Dorian Koçi, drejtor i Muzeut Historik Kombëtar, referoi temën: “Rrëfimi i periudhave historike të Ismail Qemalit përmes objekteve të tij në Muzeun Historik Kombëtar". Ndër të tjera ai në objektet e ekspozuara të Ismail Qemalit në MHK është pena e nënshkrimit të aktit të pavarësisë së Shqipërisë. “Pena është përdorur nga delegatët në Kuvendin e Vlorës të datës 28 nëntor 1912, për nënshkrimin e aktit të Shpalljes së Pavarësisë së Shqipërisë. Në pavijonin e Rilindjes Kombëtare është ekspozuar edhe një flamur i vogël tekstili i përdorur nga Ismail Qemali. Disa buste të punuara nga studentë të Akademisë së Arteve në janar të vitit 2008 edhe kabineti i Qeverisë së Vlorës, i cili u miratua më 4 dhjetor 1912”, tha dr. Koçi. Drejtoresha e Qendrës së Librit dhe Leximit, Alda Bardhyli, përshëndeti aktivitetin duke e vënë theksin tek rëndësia e këtyre aktiviteteve mbi ndërgjegjësimin për rëndësinë që ka historia, ndërgjegjja kombëtare, identiteti kombëtar dhe pavarësia. Qendra Kombëtare e Librit dhe Leximit, theksoi Bardhyli, ka nënshkruar një marrëveshje që ka në fokus jo vetëm këto çështje dhe figurat kombëtare, por edhe çdo çështje që lidhet me historinë e Shqipërisë. Prof. Ass. Dr. Ledia Dushku nga Instituti i Historisë pranë Akademisë së Studimeve Albanologjike mbajti kumtesën: “Drejt mëvetësisë: Kuvendi Kombëtar i Vlorës dhe vendimet e tij”. Frederik Stamati në tezën e tij foli “Për flamujt e Muzeut Kombëtar”. Ndër objektet me vlerë historike hyjnë edhe flamujt theksoi ai. Dr. Ermir Nika, pedagog pranë Universitetit Europian të Tiranës, mbajti kumtesën “Konceptet republikane të Andon Zako Çajupit”.