Ekspozita "E kam në zemër popullin tem shqiptar" për Nënë Terezën në MHK

Me rastin e 25 vjetorit të ndarjes nga jeta të Nënë Terezës, po njëkohësisht edhe përvjetorit të shpalljes së saj shenjtore, në mjediset e Muzeut Historik Kombëtar u çel ekspozita "E kam në zemër popullin tem shqiptar". Kjo ekspozitë u realizua falë bashkëpunimit midis Muzeut Historik Kombëtar, Institutit të Trashëgimisë Shpirtërore e Kulturore të Shqiptarëve në Shkup dhe Drejtorisë së Përgjithshme të Arkivave. Ndërkaq, fotot që u paraqitën në të u përzgjodhën nga dom Lush Gjergji, përfaqësues i Ipeshkvisë së Kosovës. Ato na njohin me jetën, sakrificat dhe veprimtarinë e jashtëzakonshme të Shën Terezës në shërbim të kauzës së saj e sidomos në ndihmë të të varfërve. Prof. dr. Skënder Asani, drejtor i Institutit të Trashëgimisë Shpirtërore e Kulturore të Shqiptarëve në Shkup, në fjalën e tij përshëndetëse, veç të tjerash, theksoi se në institutin që ai përfaqëson është ngritur një departament që mban emrin “Gonxhe Bojaxhiu” dhe se figura e Shën Terezës ka qenë si një simbol përbashkues i shqiptarëve për më shumë se 100 vjet. Më tej ai e vuri theksin te bashkëpunimi midis Tiranës, Shkupit dhe Prishtinës, duke bërë gjithashtu një historik të shkurtër të komunitetit katolik shqiptar në Shkup, vatër prej nga doli dhe vetë Nënë Tereza. Drejtori i  Drejtorisë së Përgjithshme të Arkivave, prof. as. dr Ardit Bido, në fjalën e tij u shpreh se Shën Tereza i takon mbarë njerëzimit, por mbi të gjitha ajo është shqiptare. Ai u ndal në tri letra personale të saj, të panjohura deri tani, që u zbuluan gjatë kohës së përpunimit të dokumentacionit arkivor. Ai veçoi një fjali të Shën Terezës në këto letra, ku shkruhej: “Zotit i kam dhënë besën e shqiptarit”, çka dëshmon ndërthurjen midis lokales dhe universales në personalitetin e shenjtores. Ndërsa dr. Dorian Koçi, drejtor i Muzeut Historik Kombëtar, përgëzoi organizatorët dhe të gjithë ata që u kujdesën kohë pas kohe për hapjen e kësaj ekspozite dhe udhëtimin e saj gjatë itinerarit që ndoqi në Shkup, Prishtinë dhe Tiranë, si shenja identitare të kulturës shqiptare.