Ekspozita “fotoreporteri në kohën e duhur, në vendin e duhur” do të hapet në muzeun “Marubi”

Ekspozita personale e fotografit Michel Setboun "fotoreporteri në kohën e duhur, në vendin duhur" kuruar nga Luçjan Bedeni do të çelet në muzeun “Marubi” më 25 nëntor. Në materialin e muzeut rreth Michel Setboun, thuhet se ishte vetëm 17 vjeç kur filloi udhëtimet e tij nëpër botë. “Në njërin prej tyre tek vizitonte Jugosllavinë, pati rast të ndalonte edhe në Kosovë. Ky ishte momenti që zgjoi tek ai kuriozitetin për të parë Shqipërinë e izoluar. I kamufluar si pjesë e një grupi të rinjsh marksistë francezë që vizitonin Shqipërinë në kuadër të miqësisë mes dy vendeve, Setboun vjen për herë të parë në 1981. Të kësaj vizite janë shkrepjet e serisë “Shqipëria në vitin 1981”, në të cilën nuk gjejmë asnjë imazh që tregon realitetin e burgjeve, kampeve të internimit, shkatërrimin e objekteve të kultit apo skamjen ku jetonin shqiptarët. Jeta në rrugë nën regjimin komunist në Shkodër është e vetmja foto e shkrepur tinëz, në të cilën dallohet habia që shqiptarët kishin kur shikonin të huajt”, thuhet në material. Të bën përshtypje thuhet në shkrimin rreth ekspozitës te muzeu, që me përjashtim të këtij imazhi, në këtë seri nuk e shikojmë dot Michel-in fotograf, por vetëm regjinë e pushtetit, e cila kishte një sistem të tërë trukimi, për ta shfaqur Shqipërisë një vend të lumtur e të begatë. “I ndërgjegjshëm për ekzistencën e një realiteti tjetër, ai rikthehet në 1986 e çdo vit me radhë deri në rënien e komunizmit në 1991”, thuhet në material. Ekspozita personale e fotografit Michel Setboun "fotoreporteri në kohën e duhur, në vendin duhur" kuruar nga Luçjan Bedeni që do të hapet në muzeun kombëtar të fotografisë “Marubi” në Shkodër mbështetet nga Ministria e Kulturës dhe Ambasada e Francës në Shqipëri. Ekspozita në muzeun e fotografisë “Marubi” në Shkodër vjen në vijim të veprimtarive dhe ekspozitave që po zhvillon ky institucion.