Ekspozita “Muri” me punimet e 11 artistëve, piktori Adrian Devolli: Kemi humbur besimin te institucionet, çdo gjë me kontributin tonë

Artistët e grupimit “Muri” hapën ekspozitën e dytë për publikun. Një ekspozitë me kontributin e tyre, pasi siç shprehen kanë humbur besimin te institucionet. Janë 11 artistë të njohur, që janë bërë bashkë duke prezantuar punimet e tyre në galerinë e artit “Kalo” në Tiranë. Piktori Adrian Devolli thotë se janë punime të reja, që prezantohen për herë të parë. Grupimi “Muri” u krijua për një qëllim, që sipas piktorit Devolli mosekzistenca e institucioneve dhe vlerësimi për artin bëri që këta artistë të grupohen për ekspozita të përbashkëta. “Ekspozita e dytë e këtij grupimi “Muri”organizohet vetëm me forcat tona. Nuk kemi aplikuar për projekt në institucione me këtë ekspozitë, sepse kemi humbur besimin. Unë nuk mund të ndjek dot atë burokraci mujore dhe të marr një përgjigje po banale. Më mirë me sa kemi mundësi e përballojmë vetë. Kjo është ekspozita e dytë dhe vështirësitë janë. Mosekzistenca e institucioneve si Galeria Kombëtare e Arteve apo Ministri Kulture bën që ne si autorë të grupohemi dhe të bëhemi me ekspozita të përbashkëta”, shprehet piktori Devolli. Ai tregon se ndryshe nga një vit më parë ku ekspozita shoqërohej dhe me një katalog këtë vit ai mungon. “Nuk ka katalog për shkak të buxhetit, sepse kushtonte. Nuk ia dolëm dot me katalogun e ekspozitës “Muri””, tregon Devolli.

Vlerësimi i veprave

Piktori Adrian Devolli thotë se ekspozita e përbashkët është një marrëdhënie midis autorëve, por i shërben dhe atyre dhe publikut. “Kjo është shumë e rëndësishme, shumë më tepër se sa një ekspozitë personale. Një ekspozitë e përbashkët është një marrëdhënie kulturore e fuqishme dhe i shërben shoqërisë, por mbi të gjitha dhe vetë artistit”, thotë ai. “Muri” kuruar nga Rudi Erabara është ekspozita më e re që u hap në Tiranë, por për piktorin Adrian Devolli shërben dhe për një vlerësim real të veprave të artit. Sipas piktorit, një problem është që në vendin tonë nuk ka një vlerësim si duhet. “Muri është simbolikë, arti është si puna e murit. Në historinë e tij arti ka shërbyer si një mur, ku dikush vë një gurë, etj, për të ndërtuar këtë mur të madh, që quhet art. E dyta në Shqipëri ka një mendim virtual për vlerat, pra vlerësohen njerëz të cilët nuk kanë bërë asgjë dhe kjo është si të hedhësh dorashkë: ja ku e ke murin zotëri vare veprën tënde te muri dhe shikoje se sa vlen. Pra që të mos të bëhen vlerësime virtuale, por reale mbi veprën, mbi krijimtarinë e artistëve”, thotë piktori. Në këtë ekspozitë janë 11 artistë këtë vit që marrin pjesë nga të cilët 9 janë të artit figurativ dhe dy janë skulptorë, ku përmendim Adrian Devolli, Violeta Kongo, Mira Kuçuku, Leon Çika, Mariana Goxhabelliu, Luan Boriçi, Fatmir Tufina, Llambrini Dena, Arben Meksi, etj. Sipas piktorit Adrian Devolli e veçanta e kësaj ekspozite është që këta autorë pjesëmarrës i lidh një linjë. “Pikturë në telajo dydimensionale. Ka shumë rëndësi kjo dydimensionale, por është në karaktere të ndryshme dhe kjo i mban të gjithë këta autorë që janë në këtë ekspozitë”, thotë Devolli. Ekspozita që u hap dje do qëndrojë deri më datë 30 të këtij muaji.