Ekspozita “Të ndarë, por të pashkëputur” me materiale që ilustrojnë rrugëtimin drejt lirisë

Materiale dokumentare dhe fotografike, që ilustrojnë rrugëtimin e mundimshëm drejt lirisë dhe kontributin e paçmueshëm të figurave me rol qendror në shtetformim, u paraqitën në ambientet përreth kompleksit memorial “Adem Jashari”. Në nderim të 28 nëntorit, kryedatës së historisë së kombit, Drejtoria e Përgjithshme e Arkivave (DPA) dhe Agjencia Shtetërore e Arkivave të Kosovës (ASHAK) prezantuan në Prekaz ekspozitën “Të ndarë, por të pashkëputur” . Të pranishëm në aktivitet ishin kreu i DPA-së, Ardit Bido, homologu i tij, Bedri Zyberaj, zëvendëskryeministri Besnik Bislimi, zëvendëskryeministrja, Emilja Rexhepi, ministri i Financave, Hekuran Murati, ministri i Punëve të Brendshme, Xhelal Sveçla, ministri i  Kulturës, Rinisë dhe Sporteve, Hajrulla Çeliku, nënkryetari i Kuvendit dhe i Partisë Demokratike të Kosovës (PDK), Enver Hoxhaj, nënkryetarja e PDK-së, Vlora Çitaku, parlamentarë dhe anëtarë të tjerë të kabinetit qeveritar. Në fjalën e tij për mediat, Bido theksoi se bashkëpunimet e këtyre përmasave përkojnë me vizionin e kësaj date historike për një Shqipëri të bashkuar dhe të begatë. “Po festojmë 28 nëntorin në Prekaz, siç do ta festonim në çdo trevë shqiptare. 28 nëntori ka qenë nga Preveza në Nish, ashtu siç u mblodhën delegatët. Është 28 nëntori i Skënderbeut, i UÇK-së, është një ditë madhore e kombit tonë. Kjo ekspozitë u prezantua për herë të parë dje me rastin e mbledhjes së përbashkët të kuvendeve të Shqipërisë dhe të Kosovës. Nëse do ta kapsulonim vizionin e kësaj date historike, shqiptarët duhet të formonin një shtet të përbashkët e të begatë. Këtë po bëjmë edhe sot duke respektuar realitetin. Edhe të ndarë në 5 shtete, jemi një komb. Që kjo Shqipëri të jetë e bashkuar në të gjithë elementët që përbëjnë identitetin kombëtar, të bashkuar në një ombrellë për mirëqenie, begati e krenari kombëtare”,  tha Bido. Sikurse ndodh periodikisht në datat me rëndësi kombëtare, funksionarët politikë kryen së pari homazhe në nder të të rënëve në luftë të familjes Jashari.