Ekspozita “Vishu me trashëgimi, kostume tradicionale të Beratit” në Apoloni

Ekspozita “Vishu me trashëgimi, kostume tradicionale të Beratit” e vazhdoi rrugëtimin në Apoloni, si bashkëpunim midis Qendrës Kombëtare të Muzeumeve Berat dhe parkut arkeologjik të Apolonisë. Qendra Kombëtare e Muzeumeve Berat shprehet se në këtë ekspozitë janë një kolanë fotosh të realizuara në kuadër të programit “Edukimi përmes Kulturës”, në bashkëpunim me shkollën “Drita e Dijes” e të realizuara mjeshtërisht nga artisti Ardian Fezollari, si një celebrim i një pjese të trashëgimisë kulturore të qytetit të Beratit, i asaj pasurie shpirtërore e materiale që na bën të ndihemi unik. Ekspozita “Vishu me trashëgimi, kostume tradicionale të Beratit” do të qëndrojë e hapur deri në fund të muajit mars në Trapezarinë e  Manastirit të “shën Mërisë” (Muzeu Arkeologjik) në Apoloni. Veshjet e qytetit si jakot, xhubet, jelekët, dallohen qartë nga ato të qyteteve të tjera të Shqipërisë për nga elementët e qëndisjes. Për veshjet përdorej kryesisht copë e importuar, si kadife ngjyrë vjollcë, (rrallë vishnje), si edhe copa të zeza. Krahas tyre përdorej edhe mëndafshi e një cilësie të lartë që shërbente për veshjet festive të vajzave të rritura të shtresave të mesme. Por, pa dyshim që në këto veshje gjejmë edhe ndikime orientale, si tek çitjanet, dollamaja, etj. Ekspozita që u hap më datë 8 mars në Apoloni vjen në vijim të aktiviteteve, që zhvillon Qendra Kombëtare e Muzeumeve Berat, që është institucion i specializuar dhe arkivor me status “muze kombëtar” me seli në qytetin e Beratit, e cila administron muzeun ikonografik “Onufri” dhe muzeu Etnografik. Muzetë mbledhin ruajnë dhe promovojnë koleksione me vlerë të rëndësishme të trashëgimisë kulturore të qytetit të Beratit dhe zonës përreth. Berati ka qenë një qendër e rëndësishme e zhvilluar sidomos në shek XVII, një vend ku u grumbulluan, u prodhuan dhe u ruajtën vlera të rëndësishme të cilat janë thesare të vërteta të kulturës kombëtare.