BREAKING NEWS

MSH: Ndërrojnë jetë 2 pacientë në spitalin Infektiv nga koronavirusi

MSH: Ndërrojnë jetë 2 pacientë në spitalin Infektiv
x

Kultura

Elbasan, drejt përfundimit rikonstruksioni i Xhamisë Mbret

Elbasan, drejt përfundimit rikonstruksioni i Xhamisë Mbret

Në qytetin e Elbasanit tashmë janë drejt përfundimit dhe punimet për rikonstruksionin e Xhamisë Mbret brenda lagjes “Kala”. Ky rikonstruksion që ka nisur rreth dy muaj më parë, është bërë i mundur falë kontributit të besimtarëve myslimanë në qytetin e Elbasanit dhe rrethinat e tij. Minareja e xhamisë ka përfunduar dhe tashmë po punohet në pjesën e hajatit dhe atë të brendshme të saj, ndërsa materialet e punimeve janë marrë nga mali i Sopotit në qytetin e Librazhdit. Projektuesi i rikonstruksionit së Xhamisë Mbret, Enver Samuri u shpreh se gjatë rikonstruksionit të xhamisë është ruajtur origjinaliteti i saj, duke bashkëpunuar edhe me specialistë të Ministrisë së Kulturës. Sipas tij, ky objekt do t'i shërbejë besimtarëve, por edhe turistëve që vijnë të vizitojnë qytetin e Elbasanit. Xhamia Mbret është ndërtuar në fund të shekullit XV. Ky objekt kulti ka tërhequr mjaft vëmendjen e turistëve, të cilët vizitojnë qytetin e Elbasanit. Xhamia Mbret është  prishur në kohën e komunizmit kur u prishën shumë objekte kulti me vlera të mëdha kulturore. Nuk ka të dhëna të sakta lidhur me vitin e ndërtimit të saj. Për kohën vinte e dyta në radhë pas xhamisë së ndërtuar nga sulltan Mehmeti i Dytë në vitin 1464 kur u rindërtua Kalaja e Elbasanit. Sipas të dhënave krahasuese, Xhamia Mbret është ndërtuar në fund të shekullit XV. Ajo ndodhet në distancë të afërt me Portën e Kalasë, ku mendohet se u ndërtua xhamia e parë në Elbasan fill pas pushtimit turk. Nga pikëpamja stilistike Xhamia Mbret përfaqëson tipin e faltores me sallë të mbuluar me çati druri dhe me hajat përpara. Nga pikëpamja stilistike dhe e kompozimit kjo faltore përkon me kohën e sulltan Bajazitit të Dytë, i cili ndërtoi xhami të tilla edhe në qytetet Berat, Gjirokastër, Shkodër etj. Por duket se gjatë këtij sezoni qyteti i Elbasanit ka qenë në vëmendjen edhe e atyre objekte që i takojnë trashëgimisë kulturore të nëntokës. Pak kohë më parë, në afërsi të sheshit të Namazgjasë në Elbasan, u zbuluan rastësisht rrënojat e një muri, që sipas arkeologëve i përket periudhës osmane. Ky zbulim ngjalli interesin e jashtëzakonshëm të arkeologëve, të cilët kanë vendosur që ta ndjekin nga afër ecurinë e punimeve për zbulimin e rastësishëm. Zbulimi në fjalë që dyshohet se i përket murit të një kalaje të vjetër, u bë gjatë punimeve për rikonstruksionin e rrugës "Thoma Kalefi" në qytetin e Elbasanit.