Elma Doresi: Teatri Kombëtar çdo vit të ketë festivalin e dramës shqipe dhe një vepër kombëtare

Teatri Kombëtar çdo vit duhet të ketë vepra të autorëve shqiptarë në skenë, që për artistët nuk duhet të mungojnë në aktivitetin artistik. Regjisorja Elma Doresi tregon se zgjidhja e dramës shqipe është dhe në platformën e saj për Teatrin Kombëtar. Jemi në muajt e fundit të këtij viti, por për artistët dramaturgjia shqipe vazhdon të jetë problem në skenat tona teatrore. Regjisorja Doresi, e cila herë pas here ka sjellë në skenë vepra të autorëve shqiptarë dhe është në garë për postin drejtues të Teatrit Kombëtar, thotë se drama shqipe është ndër pikat kryesore të platformës që ajo prezantoi dhe disa ditë më parë në Ministri të Kulturës. “Ndër pikat kryesore në platformën që paraqita në Ministri të Kulturës ishte dhe për zgjidhjen e përhershme të dramës shqipe. Synoj zgjidhjen përfundimtare të dramës shqipe. Teatri Kombëtar të ketë çdo vit veprën shqiptare dhe në fund do të fitojmë dhe festivalin e dramës shqipe çdo vit”, shprehet regjisorja Doresi në reagimin e saj. Disa ditë më parë me kandidatët për drejtor të Teatrit Kombëtar  u zhvillua dhe dëgjesa në Ministri të Kulturës. Ndër të tjera regjisorja Elma Doresi thotë se një titullar nuk duhet të vendosë shfaqje me regjinë e tij nëse drejton një institucion shtetëror. “Nëse më besohet ky mandat, do të jem e para drejtoreshë, që nuk do të vendos kurrë nën drejtimin tim të institucionit shfaqje me regjinë time”, shprehet regjisorja Doresi. Regjisorja Elma Doresi në aktivitetin e saj artistik ka vënë në skenë shfaqje të ndryshme teatrore, por është dhe një ndër zërat që janë shprehur për zhvillimin e teatrit në vend. Doresi shprehet se dhe në platformën e saj për drejtimin e Teatrit Kombëtar është rritja e produksioneve teatrore, shpërblimi për figurën artistike, etj, por quan të papranueshme edhe plagjiaturën në aktivitetin artistik. “Plagjiaturën është një nga gjërat, që nuk duhet të jetë në teatër.(Dënim me dëmshpërblim ). Rikthimin e shpërblimit të figurës artistike për produksionet e teatrit. Rritje e numrit të produksioneve me të njëjtin buxhet në Teatrin Kombëtar”, thotë Doresi në reagimin e saj, ku më parë ajo është shprehur edhe në rrjete sociale për pikat në platformë.

Komedia e Çajupit në skenë

Vepra e fundit që regjisorja Elma Doresi solli në skenë këtë vit ishte komedia “Pas vdekjes” e Andon Zako Çajupit në teatrin  “Avdush Hasani” të Podujevës. Më parë po në këtë teatër është realizuar dhe vepra shqiptare “Nusja në thes” nga Hekuran Zhiti dhe këtë herë Doresi erdhi në bashkëpunimin e dytë. Vepra teatrore “Pas vdekjes” erdhi në skenë për 28 nëntorin. Në role ishin Besart Zeneli, Ryva Kajtazi, Muhamet Zeka dhe Gani Morina. Më herët regjisorja Doresi tha se qëllimi i saj ishte të gjente elementet e duhur për ta sjellë temën dhe mesazhin e veprës sa më pranë publikut. Komedia “Pas vdekjes” është një nga veprat e njohur të Andon Zako Çajupit. Komedia ka temë politike-shoqërore luftën e ashpër në lëvizjen tonë politike të fillimit të shekullit XX kundër oportunistëve, konformistëve, demagogëve, që i shitnin interesat kombëtare për përfitime personale.