Faza e dytë e kërkimit arkeologjik në akropolin e Butrintit

Instituti i Arkeologjisë në bashkëpunim me Universitetin e Bolonjës po vazhdon me fazën e dytë të kërkimit arkeologjik në akropolin e Butrintit. Që nga viti 2019, janë bërë përpjekje për të hetuar akropolin e Butrintit me synim, rindërtimin e historisë së tij të gjatë. “Këtë vit, grupi i punës i përbërë nga studentë dhe specialistë italianë dhe shqiptarë, po përqendrohet në gërmimin e një ndërtese. Ajo mund të jetë përdorur përgjatë shumë shekujve duke filluar nga periudha romake perandorake. Paralelisht me gërmimet po studiohen edhe materialet që gjenden gjatë punës”, thuhet në faqen e parkut kombëtar arkeologjik të Butrintit, ku janë ndarë dhe disa foto gjatë punës me gërmimet arkeologjike. Kërkimi arkeologjik që po kryhet në akropolin e Butrintit vjen në vijim dhe të tjerë projekteve,  që po zhvillon Instituti i Arkeologjisë në vendin tonë në bashkëpunim me universitetet e huaja. Parku kombëtar i Butrintit është një nga zonat më të rëndësishme të trashëgimisë sonë kulturore, arkeologjike, mjedisore dhe turistike të vendit. Zemra e parkut kombëtar është qyteti antik i Butrintit, ekzistenca e të cilit vazhdoi pa ndërprerje, që prej periudhës së prehistorisë e deri në mesjetë, duke ofruar kështu një shumëllojshmëri kulturash dhe periudhash historike. Në saj të vlerave të larta historiko-kulturore qyteti antik i Butrintit u përzgjodh fillimisht si Monument Kulture në vitin 1948, në ligjin e monumenteve të Kulturës së Shqipërisë. Në vitin 1992 Butrinti u pranua si vendbanimi i parë arkeologjik i Republikës së Shqipërisë në listën e trashëgimisë botërore të UNESCO-s. Brenda parkut ndodhen 10 zona të shquara arkeologjike që lidhen me historinë e Butrintit.