Festivali “MetroSound” në edicionin e pestë me muzikën e viteve ’90-të, Eda Zari në skenë në natën e parë

Festivali “MetroSound” këtë vit do të zhvillohet në katër mbrëmje për publikun dhe sjell në skenë artistë të njohur. Teatri Metropol në Tiranë prezanton këtë sezon projektin e ri artistik, festivalin “MetroSound” edicioni i pestë, i cili do të sjellë për publikun muzikën më të mirë të viteve 90’. “MetroSound” edicioni i pestë do të zhvillohet këtë vit në teatrin Metropol në datat 8, 9 dhe 15, 16 qershor, ku publiku që do të jetë në netët e tij do të dëgjojë artistë të njohur në aktivitetin e tyre. Eda Zari, Petrit Çarkaxhiu, Ritfolk dhe Blla Blla Blla janë këtë vit në festival. Festivali natën e parë në 8 qershor do të sjellë në skenë këngëtaren Eda Zari. Mutter & Sohn: Një natë Jazz, Bossa Nova & Rrëfime malli! Këtë mbrëmje në skenë Eda Zari, Henning Jung - kitarë akustike, western guitar, jazz guitar, voc. Hayden Chisholm - saksofon, Gent Rushi - piano e fizarmonikë, Kiril Tufekcievski - kontrabas, Emiljan Dhimo - bateri. “A mund të thuhet se muzika është një formë e artit që tregon esencën e ekzistencës që ndriçon misteret e universit? Muzika nis e bëhet zëdhënëse e problemeve përmes narrativës tingullore martuar me fjalën”, thuhet në materialin e teatrit rreth festivalit. Në këtë natë të veçantë, tre artistë janë mjaftueshëm për të krijuar tinguj akustikë dhe melankolikë që mbuzin ajrin e teatrit, duke krijuar një atmosferë të brendshme shpirtërore.

Programi artistik

Në teatrin "Metropol", nënë dhe bir, Eda Zari e Henning Jung dhe perkusionisti i shquar Rhani Krija, përmes programit të tyre artistik thuhet në materialin e teatrit do të krijojnë imazhe tingullore, që reflektojnë emocionet më të thella të njeriut, duke tërhequr publikun në një udhëtim shpirtëror. “Kitaristi, saksofonisti dhe sinergjia pianistike, ajo e baterisë dhe kontrabasi i bashkëngjiten shkëlqyer zërit të Eda Zarit me improvizime magjike, duke shtuar një dimension të ri në këtë përzierje të mrekullueshme të zhanreve, plot spontanitet dhe surpriza. Kjo lojë artistike shpalos pikëllimin dhe nostalgjinë e zemrës, duke sjellë një emocion të pazëvendësueshëm te dëgjuesi. Në këtë natë magjike të poezisë, jazz-it, këngëve të mallit, bossa nova ?s dhe tingujve mistikë, artistja dhe muzikantët e saj bëjnë të ndihesh i humbur në një botë ku koha dhe hapësira gjejnë një kuptim të ri”, thuhet nga teatri Metropol për këtë mbrëmje të parë të festivalit “MetroSound”, që nis më 8 qershor në Tiranë. Eda Zari është e njohur në aktivitetin e saj muzikor. Performanca e artistes dhe debutimet e saj, kanë zënë vend në festivale dhe skena të ndryshme internacionale. Por këto net ajo do të jetë për publikun në teatrin “Metropol” në festivalin “MetroSound” që shënon edicionin e pestë. Një vit më parë “MetroSound Festival” u rikthye me titullin “Jehonë Arbëreshe” në teatrin Metropol dhe u zhvillua në datat 10, 11, 12 dhe 17, 18, 19 mars. Edicioni i katërt bazohej në kulturën arbëreshe, si një homazh për historinë e saj muzikore.