Festivali Ndërkombëtar i Filmit në Dropull vjen në Tiranë, për publikun do të shfaqen katër filma të vlerësuar me çmime

Katër filma të edicionit të dytë të Festivalit Ndërkombëtar të Filmit në Dropull do të shfaqen këtë mbrëmje në Tiranë për publikun. Festivali këtë vit në muajin korrik do të zhvillojë edicionin e tij të tretë në Dropull, por me filmat e tij nuk mungon dhe në Tiranë. Filmat nga Greqia dhe Shqipëria që janë fitues të edicionit të dytë të këtij festivali do të shfaqen në sallën e koncerteve të Katedrales Ortodokse në Tiranë, ku pritet dhe pjesëmarrja e regjisorëve. “Dropull International Short Film Festival” është bërë pjesë e jetës artistike, duke shfaqur në edicionet më parë prodhime të ndryshme filmash që janë mirëpritur nga publiku, por sipas drejtorit artistik Kosta Zhonga festivali nuk është thjesht një shfaqje filmash. Ai thotë se sjell filma të këtij festivali në Tiranë jo vetëm sepse është metropoli i artit, por kjo erdhi dhe si rrjedhojë e kërkesës së vazhdueshme të miqve të tij, por dhe të profesionistëve që nuk patën mundësi në vitin e shkuar për të ndjekur festivalin në Dropull. “Kjo është edhe një arsye që të dalë puna që bëhet në Dropull. Ky festival nuk është thjesht një shfaqje filmash mbi një çarçaf në një fshat të humbur, siç kam dëgjuar në mënyrë sporadike edhe këto fjalë. Ky festival vjetor, i cili organizohet në zonat turistike të Dropullit, mbledh bashkë regjisorë, aktorë dhe artistë të mirënjohur nga vende të ndryshëm të botës dhe i jep zë jo vetëm artit të kinematografisë, por gjithashtu edhe disiplinave të ndryshme të artit, si pikturë, këngë, valle, muzikë, fotografi, letërsi etj”, thotë Zhonga, që shton se gjatë këtij festivali organizohen workshope të ndryshme për fëmijë dhe të rinj, në mënyrë që të familjarizohen dhe edukohen me artin e filmit me metrazh të shkurtër, si dhe polifoninë dhe letërsinë.

Edicioni i tretë

Drejtori artistik Kosta Zhonga thotë se në edicionin e tretë, që do të zhvillohet në korrik prurjet ishin shumë më tepër nga sa pritej. “Kryesisht kemi tema sociale me problemet që ndeshim të gjithë në jetën e përditshme, pasojat e krizë s ekonomike por nuk ngelet pa u prekur tema e emigracionit dhe politika”, tregon ai. Në këtë edicion të tretë drejtori artistik Zhonga tregon se kanë përzgjedhur 7 filma me metrazh të shkurtër nga Shqipëria dhe 10 filma nga Greqia, si dhe të animuar 6 nga Shqipëria dhe 15 Greqia, ku sivjet janë edhe rreth 10 filma të animuar nga Qipro. “Por një ditë do të shfaqim filmat e realizuar në Festivalin e Olimpias, camera Zizanio me filma të realizuar nga fëmijë e të rinj deri në moshën 20 vjeç”, tregon Zhonga për festivalin. Drejtori artistik Kosta Zhonga thotë se hapja e festivalit organizohet në një nga sitet arkeologjike të Dropullit, në Teatrin Antik të Hadrianopolit. Sipas tij, ky festival ka nxjerrë në pah monumentet arkeologjike dhe historike të zonës, të cilat tashmë janë kthyer në atraksione turistike për të  gjithë botën. “Në këtë kontekst, vlerat e festivalit nuk kufizohen vetëm në aspektin artistik, por kanë efekte të vazhdueshme si promovuese të Shqipërisë turistike”, thotë ai. Edicioni i tretë i festivalit pritet që të zhvillohet në Dropull në datat 3-6 korrik.