Festivali ndërkombëtar i vokalit operistik “Marie Kraja”, edicioni i 19-të me 16 konkurrentë

Festivali ndërkombëtar i vokalit operistik “Marie Kraja” vjen këtë vit në edicionin e 19-të. Konkurrentët do të garojnë në dy disiplina dhe do të ketë një juri ndërkombëtare për vlerësimet e festivalit në edicionin e 19-të. Festivali “Marie Kraja” do të zhvillohet në skenën e Teatrit Kombëtar të Operës dhe Baletit për publikun në datat 30 dhe 31 mars. 16 zëra të rinj operistikë nga e gjithë bota do të ngjiten në festivalin më të madh shqiptar, kushtuar këngës operistike.  “Repertori do të jenë 500 vite histori” shprehet Klevis Saliaj, drejtori ekzekutiv i festivali. Ky vit vjen me risi, pasi në të dy netët nuk do të luhen vetëm këngë operistike. 16 të rinj, nga katër kontinente, në dy mbrëmje të magjishme në "Gara e arieve” dhe "Gara e këngëve” në duet me yjet e muzikës shqiptare: Aurela Gaçe, Juliana Pasha, Eneda Tarifa, Elhaida Dani, Era Rusi, Venera Lumani, Lindi Islami dhe Kamela Islamaj. Orkestra do të drejtohet nga dirigjenti londinez Martin Andre. Regjia Redi Treni dhe këtë vit moderojnë festivalin sopranoja shqiptare e skenave ndërkombëtare Enkeleda Kamani dhe Blendi Salaj. Nuk mungojnë dhe yjet e rinj të baletit drejtuar nga Alisa Gjoni. Konkurrentët në festival këtë vit do të gjykohen nga një juri ndërkombëtare, e përbërë prej drejtues të operave të mëdha evropiane dhe menaxherë artistësh nga më të njohurit. Nicolas Payne- drejtor i “Opera Europa” kryetar jurie, Zana Çela presidente e festivalit, Julia Lagahuzère drejtore e përgjithshme dhe bashkëthemeluese e “Opera për paqen” etj.  Festivali ndërkombëtar i vokalit operistik “Marie Kraja” i dedikohet zërit, ndaj dhe aplikimet për të qenë pjesë e këtij festivali kanë qenë të shumta. Në këtë festival kanë qenë mbi 300 aplikime nga e gjithë bota. Një festival ndërkombëtar, që synon dhe promovimin e talenteve të reja.