Filmi dokumentar "Alexander" kandidat për “Oscar” nga Shqipëria, do të shfaqet së shpejti në kinema

Filmi dokumentar “Alexander” me regji nga Ardit Sadiku nga muaji tetor do të jetë në kinema për publikun. Me datë 5 tetor, pritet të shfaqet për publikun në Shqipëri një prej veprave më të diskutuara të këtij viti, "Alexander". Ky film, me regji të Ardit Sadiku, është zgjedhur si kandidati i Shqipërisë për çmimin prestigjioz “Oscar”. Premiera do të ndodhë në disa nga kinematë e vendit: Cineplexx në Tiranë, Millennium në Shkodër dhe Qendra e Artit Agimi, gjithashtu në Tiranë. Filmi do të qëndrojë në kinema për dy javë, duke ofruar një mundësi të mirë për të gjithë ata që janë të interesuar të njihen nga afër me këtë vepër. Filmi “Alexander” pati premierën botërore në festivalin e filmit dokumentar “Dokufest”, që mbahet në qytetin e Prizrenit. Përtej kufijve, kritikët e kanë vlerësuar punën e regjisorit Ardit Sadiku dhe ekipit të tij. Reagimet dhe kritikat pozitive nga ekspertët ndërkombëtarë janë një tregues i mirë i vlerës dhe cilësisë së këtij dokumentari. Aleksandër Gruda, portier në një nga hotelet e Trump në New York, është heroi i dokumentarit të fundit nga regjisori Ardit Sadiku. Gjatë rënies së komunizmit në Shqipëri në vitin 1990, mekaniku i anijeve luftarake i quajtur Aleksandër Gruda ndërmori një nga bëmat më të guximshme të historisë së fundit njerëzore. Menjëherë pasi u pushua nga Marina Shqiptare, Aleksandri dhe miqtë e tij hartuan një plan piraterik për të vjedhur një anije luftarake me qëllim që të largoheshin nga vendi; kundër të gjitha gjasave, ata ia dolën drejt Jugosllavisë edhe pse duke u sulmuar me mortaja, helikopterë dhe mitraloz. “Alexander”, prodhimi më i fundit i ASF, u realizua me mbështetjen e Qendrës Kombëtare të Kinematografisë (QKK) dhe ishte një bashkëprodhim me Bayou Road Films, me bazë në SHBA.