Filmi “Një filxhan kafe dhe këpucë të reja veshur” shfaqet në “TIFF 2023”

Filmi artistik “Një filxhan kafe dhe këpucë të reja veshur” u shfaq në “Tirana International Film Festival”, që këtë vit zhvillon edicionin e 21. Filmi me skenar dhe regji nga Gentian Koçi u shfaq në qendrën e artit “Agimi”, në kuadër të sesionit Special Screening nga “Tirana International Film Festival”. Pas filmit, të pranishmit në qendrën “Agimi” mundën të bashkëbisedojnë me regjisorin Gentian Koçi, si dhe producenten Blerina Hankollari. Filmi “Një filxhan kafe dhe këpucë të reja veshur”, financuar edhe nga Qendra Kombëtare e Kinematografisë (QKK) ka marrë vlerësime të ndryshme, si dhe ishte kandidatura shqiptare e një viti më parë, për në çmimet “Oscar”. Filmi rrëfen historinë e dy vëllezërve, binjakë identikë, të cilët përballen me një sëmundje gjenetike e cila i lë të verbër dhe atyre u duhet të marrin një vendim të rëndësishëm, pikërisht ndërsa janë duke pirë një filxhan kafe. Filmi artistik “Një filxhan kafe dhe këpucë të reja veshur” është financuar nga Qendra Kombëtare e Kinematografisë, RTSH, Qendra Greke e Filmit, Televizioni Publik Grek, Qendra Kinematografike e Kosovës, Instituti Portugez i Kinemasë dhe Audiovizualit, Eurimages, Media-Creative Europe dhe Bashkia e Tiranës. Filmat këtë edicion të festivalit po shfaqen në kinema Millennium, qendra e artit “Agimi”, Liceu Artistik dhe Piramida. Ceremonia e hapjes së “TIFF 2023” u organizua më 23 shtator, në kinema Millenium. Filmat e përzgjedhur janë premiera kombëtare, e midis tyre edhe premiera botërore,  Europiane dhe rajonale. “Tirana International Film Festival 2023” sot zhvillon ditën e fundit të tij.