Fiorentina interesohet për Bajramin, Broja drejt Uest Ham, Roshi me ekip të ri në Turqi

Lojtarët e Kombëtares po përpiqen të gjejnë destinacione të reja më cilësore për karrierën e tyre dhe në fokus këto ditë kanë qenë Asllani, Broja, por edhe Bajrami. Ky i fundit kërkohet nga disa klube të Serisë A, por mediat italiane flasin për një alternativë të re cilësore. Kështu, Fiorentina ka parakaluar Lacion dhe Sasuolon në garën për transferimin e mesfushorit të Shqipërisë, Nedim Bajramit. “Sportmediaset” ka shkruar të mërkurën, se Fiorentina është afër marrëveshjes me Empolin për transferimin e Bajramit këtë verë. Fiorentina ka marrëveshje në parim me Bajramin dhe për kartonin e tij, i ka ofruar Empolit 10 milionë euro. 23-vjeçari ka shkëlqyer sezonin e fundit te Empoli, ku ka shënuar nëntë gola dhe ka bërë shtatë asistime në 38 paraqitje në të gjitha garat. Ai ka kontratë me Empolin deri në vitin 2024.

Broja drejt Uest Ham

Sipas “Express”-it britanik, sulmuesi i Çelsit, Armando Broja, është i gatshëm të bëjë një udhëtim të shkurtër nëpër Londër për t’iu bashkuar Uest Hamit pikërisht në merkaton e kësaj vere. Shqiptari bëri përshtypje si i huazuar te Sauthempton sezonin e kaluar dhe Uest Ham tashmë ka filluar bisedimet fillestare me Çelsin për një lëvizje të mundshme për të riun. 20-vjeçari shënoi gjashtë herë për Saints sezonin e kaluar dhe Uest Ham ende nuk e ka zgjidhur enigmën e sulmuesit. Broja është i interesuar për të vazhduar të luajë futboll si titullar pasi ka shijuar aksionin e Premier League për Sauthempton sezonin e kaluar. Dhe Uest Ham mund të jetë gati të nisë një ofertë hapëse prej 30 milionë funteve. Shqiptari është i përgatitur të vlerësojë të gjitha ofertat që vijnë për të këtë verë, me Uest Hamin që shihet si një nga kryesuesit pasi Broja mund të qëndrojë në Londër. Megjithatë, ka interes edhe nga Napoli, edhe pse kjo mund të varet nga e ardhmja e Viktor Osimhen. Por, Çelsi mund të jetë i frikësuar për t’ia shitur një rivali dhe largimi i Romelu Lukaku madje mund ta detyrojë Brojën të futet në planet e Thomas Tuhel sezonin e ardhshëm. Gjermani pritet t’i japë një shans të huazuarit të vitit të kaluar në fazën përgatitore, me Konor Gallager, Billi Gilmour dhe Broja që të rikthehen të gjithë. Dhe me Çelsi që pranoi ta dërgojë Lukakun në një huazim për një sezon te Interi, pozicioni i numrit 9 është liruar edhe një herë.

Odise Roshi ndryshon skuadër, por mbetet në kampionatin turk

Sulmuesi i krahut, Odise Roshi, ka ndryshuar skuadër por jo kampionat. Lojtari i Kombëtares kuqezi ka firmosur kontratë dyvjeçare me ekipin e sapongjitur në Ligën e Parë të Turqisë, Sakariaspor. Roshi kishte mbërritur një ditë më parë në Sakaria, ku iu nënshtrua testeve mjekësore, ndërsa paraditen e kësaj të mërkure e hodhi edhe firmën mbi kontratë. Futbollisti kuqezi do të përfitojë rreth 300 mijë euro në sezon në ekipin e ri. Sezonin e kaluar Roshi ishte pjesë e Bolusporit. Ai u aktivizua në 28 ndeshje të kampionatit, duke shënuar edhe një gol, atë në fitoren 1-2 në fushën e Ankaraguçusë.