“Fondi i Artizanëve” për promovimin, ruajtjen dhe përcjelljen e artizanatit

 “Fondi i Artizanëve 2023”  do të ndahet në projektet e këtij viti. Ministria e Kulturës shprehet se në përputhje me misionin dhe politikat për promovimin dhe krijimin e hapësirave mbështetëse dhe promovuese për artizanët dhe zejtarët shpall “Fondin e Artizanëve 2023”. Ministrja e Kulturës Elva Margariti shkruan gjithashtu në rrjete sociale se këtë vit një vëmendje të veçantë do t'i kushtohet artizanatit dhe përcjelljes së dijebërjes. “Ndaj kemi hapur një thirrje të posaçme për projekte që promovojnë dhe përcjellin te brezat e rinj mjeshtëri që janë zhdukje”, shprehet ministrja e Kulturës në rrjete sociale. Kjo thirrje e Ministrisë së Kulturës synon të mbështesë financiarisht me fonde publike projektpropozime të paraqitura nga individë-artizanë, persona juridikë të regjistruar si OJF dhe persona fizikë të regjistruar në QKB, të cilët kanë në objekt të veprimtarisë së tyre promovimin, edukimin, mbrojtjen, ruajtjen dhe përcjelljen e artizanantit tradicional. “Ky fond do të mbështesë projekte, të cilat stimulojnë përcjelljen e zanateve dhe profesioneve tek të rinjtë, me qëllim mësimin dhe edukimin profesional të një brezi pasardhës artizanësh, të cilët do t’i trashëgojnë këto profesione. Projektet përfituese nga ky fond realizohen nën kujdesin e Ministrit të Kulturës, sipas motos: “E ardhmja është në origjinë””, thuhet në njoftimin zyrtar të Ministrisë së Kulturës.  Nën moton “E ardhmja është në origjinë”, fondi përfshin një mbështetje deri në 10 milionë lekë të vjetra. Afati i aplikimit: 25 janar-25 shkurt 2023. Aplikimet do të dorëzohen në formë të printuar , dorazi ose në rrugë postare, në zyrën e protokollit të Ministrisë së Kulturës. Punimet artizanale cilësohen një pasuri e çmuar që tregojnë vlerat, kulturën dhe identitetin e një vendit.