Gërmimet arkeologjike rifillojnë në Finiq

Gërmimet arkeologjike në parkun arkeologjik të Finiqit në mesin e muajit shtator rifilluan sërish. Projekti i përbashkët arkeologjik shqiptaro-italian i ka përqendruar kërkimet e tij në zonën publike të qytetit antik, aty ku në periudhën Perandorake Romake mendohet të jetë zhvilluar Forumi. Drejtoria Rajonale e Trashëgimisë Kulturore Vlorë shprehet në faqen e saj se strukturat që po nxjerrin gërmimet arkeologjike dëshmojnë për godina monumentale, të cilat në zonën e pjerrët qëndronin mbi tarracime. “Zona është e aksesueshme për vizitorët që zgjedhin të vizitojnë parkun arkeologjik të Finiqit. Në këtë park paralelisht me gërmimet arkeologjike, nga D.R.T.K-Vlorë janë kryer ndërhyrje restauruese, si dhe është rinovuar e gjithë infrastruktura e parkut me tabela shpjeguese e orientuese. Përfitoni nga prania e arkeologëve gjatë muajit shtator dhe vizitoni parkun arkeologjik të Finiqit”, thuhet nga DRTK Vlorë që ka ndarë dhe foto gjatë punës që po bëhet këtë kohë me gërmimet arkeologjike. Qyteti i lashtë i Finiqit përbën një vlerë të madhe historike dhe arkeologjike. Qyteti antik i Foinikës mori statusin park arkeologjik kombëtar në vitin 2005. Foinikia ka një histori të lashtë. Ai ka qenë kryeqendra e kaonëve, ndërsa në shekullin III u bë kryeqyteti i gjithë shtetit të Epirit. Parku arkeologjik i Finiqit ndodhet në një kodër 283 metra të lartë mbi nivelin e detit, 9 km në lindje të qytetit të Sarandës. Krahas monumenteve në brendësi të mureve fortifikuese, kodra e Finiqit ofron për vizitorët një eksperiencë të jashtëzakonshme, falë pozicionit gjeografik nga ku mund të kundrohet ultësira e Bistricës, liqeni i Butrintit dhe gjithë pellgu i Delvinës.