Herion Mustafaraj: “Tirana International Film Festival” prezanton punën time të parë si regji filmi me "The Shot”

"The Shot" është filmi i parë për Herion Mustafarajn si regjisor. Filmi me skenar dhe regji prej tij sot do të shfaqet premierë në “Tirana International Film Festival”, që po zhvillon edicionin e 21 këtë shtator në Tiranë. I vlerësuar nga publiku me atë që ka sjellë ndër vite me filmat ku ka qenë në role, për Herion Mustafarajn "The Shot" ose "Çkrepja" është filmi i parë për të si regjisor, ku ai është krenar të sjellë në ekranin e kinemasë indipendente  një histori shqiptare të viteve 1900. Një histori fotografie. Regjisori Herion Mustafaraj thotë se arti i kinemasë e sjell përsëri në një festival, por këtë herë si autor filmi. ““TIFF” prezanton punën time të parë si regji filmi me "The Shot".  Pas 47 vitesh që në pjesëmarrjen time në Festivalin e Parë të Filmit Shqiptar në vitin 1976 me "Beni ecën vetë " arti i kinemasë më sjell përsëri në festival me një dimension tjetër si autor filmi. Shpresoj të shoh miqtë e mi të mirë artistë e jo vetëm në kinema Millenniun për të parë disa nga filmat më të mirë të shkurtër shqiptar të 2023 të përzgjedhur për konkurrim në “Tirana International Film Festival””, shprehet Mustafaraj ndër të tjera. Shqipëria e viteve 1900 përballë 2 koncepteve të një fjale të vetme "Çkrepja" . Gishti që shkrep këmbëzën e pushkës dhe ai që shkrep aparatin fotografik. I pari të merr jetën, i dyti të jep një kujtim të përjetshëm. Noari një fshatar i varfër rrezikon gjithçka ka për të qenë i përjetshëm kujtimi i familjes së tij. Në film roli i Noar luhet nga Lulzim Zeqja, Qazim Beu-Bujar Asqeriu, Arsa-Nadia Mançe, Emma-Ermira Hysaj, për të vijuar në rolet e tjera dhe me Evita Kondin, Blerim Pashtanjakun, Askanio Hoxha, Eqerem Zeko, Kudret Alikaj, Arjan Kondi, Endrin Hajdini, Kaman Çafaj. Në film janë dhe Roland Çenko, Florian Çafaj dhe Patrik Kondi. Në filmin me regji nga Mustafaraj, që shfaqet sot pasdite në “TIFF 2023” drejtor fotografie është Arianit Gjonbalaj, muzika Natasha Hatibi, editor Trim Radoja. Producent: Tony Reagan, Herion Mustafaraj, Bujar Hoxha. Coproducent: Agim Shenedjela, Julian Balla.

Aktiviteti ndër vite

Herion Mustafaraj në moshën 6- vjeçare fillon karrierën si aktor me rolin e Benit në filmin "Beni ecën vetë". Ky rol çeli bashkëpunimin me regjisoren Xhanfise Keko edhe për dy filma të tjerë. "Tomka dhe shokët e tij" me rolin e Vaskes dhe "Pas gjurmëve". Në adoleshencë luan rolin e Albanit tek "Shoku ynë Tili" e më pas Agimin në filmin "Rikonstruksioni". Herion Mustafaraj mbaron studimet në Akademinë e Arteve Tiranë në 1990 për Aktrim dhe emigron në Amerikë. Për Herionin ëndrra Hollivudiane u bë realitet pas shumë angazhimeve në teatrin amerikan si aktor në Boston, New York e Los Angeles. Herioni bëhet anëtar i SAG (Unionit të Aktorëve Amerikan) në 2002 me filmin "War Stories" protagonist Jeff Goldbloom. Më pas kreditet e tij filmike përfshijnë role në filmat amerikan si: "Cash Only", "Being American", "Trace", "Killerman". Kredite si shkrimtar, producent dhe aktor në IMDB i merr me filmin "Bird Poop" të regjisorit Mishel Koçiu. Merr pjesë në produksione filmike me Papadhimitri Production si "Out of a dream" dhe "Love". Së fundmi në postproduksion është filmi "Broke English" i regjisorit Malik Bader, ku luan sërish përkrah aktorit Nickola Shreli.