Juria e “Fondit të Librit me Ilustrime” mblidhet në QKLL për projekt-propozimet

Anëtarët e jurisë së “Fondit të Librit me Ilustrime” u mblodhën pranë Qendrës Kombëtare të Librit dhe Leximit për të shqyrtuar projekt-propozimet e paraqitura. Juria e këtij fondi kryesohet nga Vladimir Myrtezai dhe anëtarë Gëzim Tafa dhe Ylljet Aliçka. Sipas QKLL u morën në shqyrtim botimi “Shtëpia e gudulisur” me ilustrues Irel Çupi nga “Botart”, libri “Letra në ishull” ilustrues Artur Dauti botim i “Mediaprint”, librit “Mërmërima e kroit të moçëm” me piktor Anastas Kostnadinin botim nga “Toena”, si dhe libri “Baladë për tim atë e për vete” me ilustruese Ormira Lulani nga botimet “Dritëro”. Qendra Kombëtare e Librit dhe Leximit shprehet se qëllimi i këtij fondi është mbështetja e artit të ilustrimit dhe vijimi i një tradite shqiptare dhe botërore në fushën e editorisë, duke dashur të frymëzojë një brez të rinj artistësh të kësaj fushe krijimi. Thirrja u hap më datë 11 nëntor dhe qëndroi deri më datë 26 nëntor. Projekti “Fondi i Librit me Ilustrime”, do të vijojë të shpallet nga Qendra Kombëtare e Librit dhe Leximit edhe në vitet e ardhshme. Libri duhet të jetë i pabotuar ose në proces botimi. Aplikimi u krye nga individë, ose ente botuese të pajisur me licencë botimi, nëpërmjet përfaqësuesit ligjor. Financimi për mbështetjen e procesit krijues të veprës do të mundësohet nga QKLL-ja dhe i shkon drejtpërdrejt krijuesit. Fituesit shpallen në datën 7 dhjetor 2020. Kjo thirrje vjen në vijim dhe të atyre që janë hapur më parë në fushën e letërsisë dhe përkthimeve. Në vijim të aktiviteteve që ka zhvilluar Qendra Kombëtare e Librit dhe Leximit (QKLL) përmendim dhe Festivalin e Letërsisë gjatë muajit tetor në vendin tonë. Festivali i Letërsisë hapi siparin në hapësirat e Qendrës Kombëtare të Librit dhe Leximit. Në faqen zyrtare të Qendrës Kombëtare të Librit dhe Leximit shkruhet se misioni i saj është ndjekja dhe zbatimi i projekteve në fushën e librit, sipas programit qeverisës të ministrisë përgjegjëse për librin, duke synuar përhapjen e kulturës së leximit në të gjithë vendin, nxitjen e krijimtarisë, forcimin e rolit promovues dhe edukativ të bibliotekave dhe mbështetjen e projekteve për promovimin e letrave shqipe në tregun evropian dhe atë botëror.