Kalaja e Gjirokastrës, 1.745  vizitorë në muajin shkurt

Vizitat turistike në kalanë e Gjirokastrës në muajin shkurt kanë ardhur duke u rritur krahasuar me të njëjtën periudhë të një viti më parë. Kjo bëhet me dije nga Drejtoria Rajonale e Trashëgimisë Kulturore Gjirokastër, që ka publikuar në faqen e saj dhe të dhënat për numrin e vizitorëve. “1,745 vizitorë gjatë kësaj periudhe ose +895 vizitorë më shumë se gjatë të njëjtës periudhë në vitin 2022”, thuhet nga DRTK Gjirokastër. Kalaja është një histori e lidhur me qytetin e Gjirokastrës dhe përmendet për herë të parë si qytet dhe kështjellë në vitin 1336. Megjithatë, historianë të ndryshëm mendojnë së ekzistenca e kalasë së gurtë është më e hershme. Kulmin e historisë së saj kjo kështjellë do ta kishte në periudhën e Pashallëkut të Janinës, kur Ali Pashë Tepelena do të realizonte një sërë ndërtimesh të reja apo ndërhyrje të tjera, duke i dhënë kalasë së Gjirokastrës fizionominë arkitektonike dhe ndërtimore që ka sot. Duke filluar nga viti 1968, skena e gurtë e kalasë së Gjirokastrës pret me bujari instrumentistët, këngëtarët dhe valltarët e folkut në kuadër të Festivalit Mbarëkombëtar Folklorik të Gjirokastrës. Njëkohësisht, gjatë këtyre viteve, mjediset e kalasë kanë shërbyer edhe për organizimin e koncerteve, spektakleve dhe panaireve të ndryshme kulturore. Kalaja e gurtë është edhe një prej pikave më tërheqëse në guidat e grupeve turistike vendase dhe të huaja që vizitojnë Gjirokastrën e mbrojtur nga UNESCO. Ishte korriku i vitit 2005, kur Gjirokastra u bë pasuri e UNESCO-s përmes një procesi shumë mikpritës dhe dashamirës nga përfaqësuesit e UNESCO-s dhe të gjitha vendet anëtare të kësaj organizate. Gjirokastra ka dhe shtëpitë historike, që janë atraksione turistike për këdo që viziton qytetin e gurtë.